Rev 16 fanmiy Seselwa pour ganny zot prop lakaz in vin en realite avek konstriksyon en nouvo vilaz dan distrik Pointe Larue.

Sa vilaz, batize Vilaz France Joseph e ki konpri 16 apartman de lasanm, ti ofisyelman ouver Merkredi 8 Oktob apremidi par Minis pour Litilizasyon Later ek Labita, Msye Joseph Belmont, e manm Lasanble Nasyonal pour distrik Pointe Larue Msye Dick Esparon.

Sa seremoni, ki form parti aktivite pour mark Lasemenn Labita ki ti demare Lendi, ti osi asiste par serten minis e o-zofisye dan gouvernman, lezot envite ensi ki bann zabitan sa vilaz.

Sa proze ki'n ganny antreprann par kontrakter China State Engineering Corporation ti komanse an Out lannen pase e in kout environ 4.5 milyon roupi antyerman finanse par gouvernman.                  

Letan i ti pran laparol kot sa seremoni Minis Belmont ti dir avek bann zabitan Vilaz France Joseph ki sa popriyete pou vin pour zot menm e ki zot dwatet pran swen avek li.

Minis ti osi mansyonnen ki i annan ankor apepre 180 demann pour lakaz dan sa kategori dan distrik Pointe Larue e ki i annan ankor lezot proze ki deza dan staz planifikasyon, tel ki proze Anse Francois e proze Ex-Albert.

"Sa lokazyon in demontre ankor enn fwa polisi gouvernman pour ki sak fanmiy Seselwa i kapab posed son prop lakaz," minis ti azoute.

Firamezir bann lokater Vilaz France Joseph pou ganny demande pour aste zot apartman atraver en lón avek labank komersyal an kolaborasyon avek Housing Finance Company.

Dan en pti lentervansyon Onorab Esparon ti dekri sikse par deryer realizasyon sa proze ki'n vin atraver etrwat kolaborasyon ant ladministrasyon distrik Pointe Larue e Minister Litilizasyon Later ek Labita.

Pour terminen, en zabitan sa nouvo vilaz, Ms Julie Melanie, ti remersye gouvernman e lotorite distrik pour zot zefor pour ed tou fanmiy ki bezwen en lakaz.

Minis Belmont, akonpannyen par bann envite ek zabitan, ti apre vizit sa vilaz.

Vilaz France Joseph

LINKS