Nouvo Prezidan Seychelles, Msye James Alix Michel, in fini vin o pouvwar apre sa seremoni tre tousan ki ti fer dan zarden State House Merkredi le 14 Avril.

Pep Seselwa in swet li labyenveni e nou'n dir mersi Msye France Albert Rene pour sa 27 an ki in diriz pei e transform li pour vin sa ki i ete ozordi.

Avek sa pasasyon pouvwar, en nouvo letap nou listwar in komanse. Nouvo Prezidan Michel in byen ganny akeir par pep Seselwa, an partikilye lanons ki son stil gouvernman pou enn ki pou baze lo dyalog.

Aprezan i bezwen sipor nou tou pour li kapab fer marse pei byen. Pandan dyalog e konsiltasyon avek li fodre ki nou sizesyon e rekomandasyon i fer sans e fer avek senserite. Fodre ki i bann keksoz ki kapab ganny aplike dan konteks Seychelles.

Si non, i pa pou serye lo nou par si nou dir nou pou partisip dan dyalog, nou serye akoz nou anvi byennet Seselwa, e apre nou vin propoz bann keksoz ki nou menm nou nou konnen i enposib aplike zis pour fer kwar nou pa'n ganny ekoute.

Annou fer keksoz serye nou tou ansanm pour ki nou pei a rezourd son bann problenm o pli vit posib e avans devan.

LINKS