Prezidan i ordonn en loperasyon entans kont krim

Prezidan James A. Michel in demann Lapolis pour mont en loperasyon entans avek led Lafors Defans pour konbat sa nouvo vag vol ek vyolans dan pei.

En kominike sorti State House i dir ki sa loperasyon i an fors a partir dernyen 24er pour fer sir ki tou dimoun i kapab kontinyen viv dan sekirite e dan lape.

In annan plizyer ka vol ek vyolans dan sa dernyen zour dan Nor ek Sid Mahe ki'n enplik Seselwa osi byen ki touris.

En portparol State House i dir: “Prezidan Michel i deplor sa ki'n arive e i oule a tou pri fer sir ki pei i retourn dan lape ek stabilite o pli vit posib. E par konsekan i pou met tou resours posib pour konbat kriminalite dan pei”.

Fodre fer rapel ki Prezidan Michel i atas bokou leportans avek lefe ki pep Seselwa i bezwen viv dan lape ek sekirite.

I ti fer sa tre kler letan i ti deklare dan son diskour inogirasyon le 14 Avril sa lannen ki sa i enn son bann vizyon pour Seychelles.

I ti dir: "Mon vwar en pep ki pe viv an sekirite e san lafreyer. Dan sa konteks, mon pou asire ki lalwa ek lord i ganny respekte. Drwa sitwayen pou ganny proteze. E mon pou tre ferm lo la.”

LINKS