Zanfan lekol, senn an zeneral e dimoun pli aze pour zwenn ansanm pour montre sa letensel Kreol

En spektak batize En Letensel Kreol i enn bann pwen for seremoni louvertir Festival Kreol 2003 ki pou fer Sanmdi le 25 Oktob dan Stad Popiler apartir 6.45 diswar.

Dapre organizater sa festival anyel, zis avan louvertir ofisyel sa levennman pou annan en laserenad par reprezantan diferan lorganizasyon parey Minister Lasante, Scouts Club, zanfan lekol ek distrik.

Bann partisipan dan sa laserenad pou arme avek bann tablo ki pou demontre bann diferan tenm tel ki zwe ek lanmod tradisyonnel.

Sa laserenad, ki pou komans kot Kolez Lar, Mont Fleuri, pou pas par semen Francis Rachel, fer letour Lorloz, desann par Independence Avenue e rantre dan Stad Popiler par baro ki vir avek Yacht Club.

Kontrerman ek bann lannen pase letan sak group ti zwe zot prop lanmizik, sa lannen se Radyo FM (SBC) ki pou zwe lanmizik pirman kreol Seselwa pandan Laserenad.

Spektak En letensel Kreol, ki pou vwar partisipasyon anviron 450 dimoun, pou deroul an trwa parti e i pou demontre sosyete Seselwa yer, ozordi e demen.

Atraver tablo yer bann partisipan pou demontre diferan laspe nou tradisyon ek bann bon moral ki nou bann gran paran in enkilke dan nou.

Tablo ozordi pou demontre plis laspe lazenes dan modernite tandis ki tablo demen pou demontre ki mannyer nou kapab pran tou sa ki’n arive dan lepase ek ozordi e anmenn li ver lavenir.

Sa spektak, ki pou deroul lo en lasenn ki pou pran laform en lakaz tradisyonnel, pou vwar partisipasyon santer lokal popiler parey John Vital, Ralf, Patrick Victor, Brian Matombé, Marie-May Larue, Jany de Létourdie e osi Lakoral Zanfan.

Sa spektak avek bokou mouvman, ladans ek lanmizik pou termin avek en "boum", dapre Eudoxie Volcy, enn parmi bann direktris artistik sa levennman.

I ti azoute ki lenstriman tradisyonnel bonm pou ganny servi pour donn sa spektak son vre lanpler.

Laplenn Stad Popiler pou sa swar ganny transformen dan en kwen tapi kot bann zanfan pou prezant diferan tablo avek laspe tradisyonnel.

Pandan spektak, ki pou fer dimoun reviv en pe le pase, pou osi annan zwe lalimyer.

Moman solanel sa spektak se ler Jose Bonnelamme pou lir en poenm avek tit Lespwar ekrir par Msye Andrea Mounac.

LINKS