Festival Kreol sa lannen, ki pou deroul depi le 25 ziska le 31 Oktob, pou pran en nouvo lanpler avek bi fer sa manifestasyon anyel lo kalandriye kiltirel Seselwa vin pli ris.

Msye Michel Savy, asistan direkter Festival Kreol, in dir ki komite lorganizasyon sa festival pe sa lannen enkorpor plizyer nouvo eleman dan sa festival.

Apard bann aktivite labitid parey selebo, Dimans kreol borlanmer, kolok, lekspozisyon, sware kreativite, kwiz, konkour diskour, konpetisyon ladans kanmtole, bal asosye, fon lanmal ek bal asosye, Festival Kreol 2003 pou osi enkli plizyer nouvo aktivite parey lavant manze ki pou fer toulezour kot Water Front park, Domaines Val des Près e osi dan bann lotel.

En lot nouvote sa lannen se Berceau des artistes, ki pou ganny fer kot Domaines Val des Près. Sa aktivite, ki pou deroul toulezour pandan festival, pou enkli plizyer animasyon artistik par diferan artis Seselwa ki mwen popiler.

"Sa aktivite ava donn sans bann artis endividyel ki mwen popiler pour promot zot lanmizik," Msye Savy ti dir.

Minister Gouvernman Lokal, Sport ek Kiltir pou osi profit sa letan pour relans nouvo polisi bann diferan divizyon dan sa minister.

Pour sa lannen diferan seksyon dan divizyon kiltir parey Konsey Nasyonal pour Lar, Bibliotek Nasyonal, Arsiv ek Leritaz Nasyonal pou mont en lekspozisyon lar lo plizyer size parey larsitektir kreol, krwayans tradisyonnel e evolisyon lanmizik dan Seychelles.

Sa lekspozisyon pou enkorpor avek en lot lekspozisyon lapentir ki ganny fer tou le lannen par bann zenn artis kreolofonn.

Seremoni louvertir, ki pou fer Sanmdi le 25 Oktob, pou demar avek en laserenad ki pou komans apartir 4er apremidi kot Kolez Lar, Mont Fleuri, e termin kot Stad Popiler.

Sa pou swiv tou-d-swit apre par en spektak varyete par plizyer artis Seselwa.

Diferan distrik pou osi demontre nou tradisyon atraver en spektak vivan.

Otour seremoni louvertir plizyer lezot aktivite parey selebo, spektak fok, sware sega ki pou fer dan Stad Lanmizik ziska granmaten pou osi pran plas.

Sa menm swar pou osi annan en sware organize an kolaborasyon avek divizyon lazenes lo zarden zanfan. 

Msye Savy in osi dir ki dan tou bann aktivite, bokou lanfaz pou ganny mete lo tradisyon. I ti dir ki par egzanp, bann aktivite Dimans Kreol borlanmer pou enkli plis aktivite tradisyonnel.

Parey in leka dan lepase, sa lannen Festival Kreol pou osi akey plizyer zanmi ek envite sorti dan larezyon ek lezot pei kreolofonn. Parmi bann envite i stilis Guadeloupéen Dominique Virassamy, santer Serge Lebrasse ek Ladii sorti Maurice, group Réunionnais Ziska Kan, Jaojoby sorti Madagascar, Malesh sorti Comores, ki pou partisip akote plizyer lezot artis lokal dan Lakadans ki pou fer le 31 Oktob.

Kolok, sa foronm enternasyonal, pou sa lannen deroul anba tenm 'Kreol en group lalang dinamik dan lemonn'. I pou vwar partisipasyon plizyer Lengwis ek seser Seselwa ensi ki bann sorti Liniversite Maurice, Réunion, Martinique, France, L'Allemagne, Canada, Ste Lucie e Etats Unis.

Parey dan bann lannen pase, sa lannen osi pou annan en lotri me komite organizasyon pa pe vann tiket sa voyaz. Zot in plito deside vann kopi progranm festival ki pou kout R5. Sak progranm pou annan en nimero ki pou servi koman en lotri ki pou tire pandan selebrasyon.

Touzour dapre Msye Savy, sa galeri obor Bibliotek Nasyonal pou transform an en laboutik souvenir Festival Kreol.

Msye Savy pe lans lapel pour ki manm piblik i desann an gran nonm pour partisip dan bann aktivite e kot bann aktivite peye i pe demann zot pour aste zot tiket boner pour evit dezapwentman.

LINKS