Seremoni louvertir sa festival ki ti ale pour apepre 2 er-d-tan ti fer zis apre ki bann partisipan Laserenad ki ti komans Mont Fleuri ti'n antre dan stad.

Vis-Prezidan Michel, ki ti envite doner, ti lans sa festival apre diskour fer par Minis pour Gouvernman Lokal, Spor e Kiltir, madanm Sylvette Pool.

Vis-Prezidan James Michel i deklar

18enm Festival Kreol ofisyelman ouver

Parmi bann lezot envite distenge ti annan Madanm Sarah Rene, madanm Prezidan Larepiblik Msye France Albert Rene, san oubliy manm plizyer delegasyon enternasyonal sorti La Réunion, Maurice, Madagascar, Comores, Guadeloupe e Inde.

Ler i ti pe adres lafoul, Vis-Prezidan Michel ti dir ki “nou kreolite i reprezant lasours e fondasyon nou sosyete Seselwa, ki nou bann zenerasyon in erite pandan sa deryen 230 lannen e ki son bann bon valer in ganny rekonnet atraver Festival Kreol."

I ti dir: “Si i annan en moman dan nou lavi kot nou pli bezwen nou bann valer Kreol se la konmela.” Vis-Prezidan ti azoute ki an vi bann sanzman ki pe arrive dan lemonn, nou bezwen sa bann valer imen ki dan nou kiltir akoz se zot “ki gard nou ansanm, ki gard nou for, ki fer nou ini e fer nou atrap lanmen kanmarad pour ki nou al devan nou tou ansanm.”

Vis-Prezidan ti fer resorti ki dan nou sosyete “pa kapab annan plas pou vyolans, move latitid, move lenfliyans e mank respe,” akoz dan nou kiltir, i ti dir, “nou abitye viv ansanm, annan respe pour nou prosen, zet en koudey lo zanfan nou vwazen, annan tolerans, anmiz ansanm ler nou dan lazwa e ed kanmarad dan moman tris.”

I ti envit pep Seselwa pour fet ansanm sikse sa festival ki pandan sa 17 lannen in fer gran sikse e swete ki i a kontinyen gard nou ansanm konman en pep ini, solid e fyer nou bann valer, tradisyon e kiltir. 

Dan son diskour, Minis Pool ti anonse ki byento son minister pou lans en nouvo polisi kiltirel ki pou avantou met lanfaz lo proteksyon e revalorizasyon bann valer e fason viv ki fer nou vre kiltir Kreol Seselwa. I ti dir ki Festival Kreol i en selebrasyon nou lidantite Kreol dan tou son splander e ki sa lannen ti en bon lokazyon pour nou egzamin son progre pandan tou sa bann lannen, son bann pwen for, pwen feb, e reflesir lo en nouvo stratezi pour anmenn sa festival lo en nivo ankor pli o.

Minis ti lans en lapel avek bann zenn pour ki zot reste bann gardyen fidel nou leritaz.

“Se sa leritaz ranpli avek larmoni e respe dan fanmiy, dan vwazinaz e dan sosyete an zeneral”  ki son minister, i ti dir, pou esey fer viv atraver en polisi kiltirel vivan e dinamik. 

Bann dsikour ti swiv par en spektak “En Letensel Kreol,” ranpli ek kreativite e nouvote ki ti alim stad sa swar. Sa spektak, ki ti deroul dan pti lakaz an trwa tablo, enkli reviv lepase, lavi ozordi e rev ver en lavenir, ti war partisipasyon plizyer santer e santez parey Ralph, Jean-Marc Volcy, Brian Matombe, John Vital, Jany de Letourdie, Marie-May Larue e Patrick Victor.

Pandan ki bann performans ti ganny fer dan pti lakaz, anba dan laplenn plis ki 400 zenn koman vye ti pe atraver bann aktivite ki zot ti pe fer, parey zwe ronn, boul, sot lakord, dans kanmtole,  kre sa vre latmosfer Kreol.  

Se kok sante lo granmaten, en performans ladans,  ki ti demar sa spektak. Lanbyans ti apre vin pli ritme e kontinyen sofe ler Jean-Marc ti larg “Gou Kreol” e moutya par Brian Matombe ti fer bokou oule leve e bouze. “Otto e Camilla” par Jany de Letourdie ti fer stad tranble e spektak ti pran en lanpler merveye ler lavwa bann zanfan ki dan lakoral ti fer Victoria rezonnen avek bann morso lanmik Kreol klasik e modern ki zot ti enterprete.

Me sa spektak sa swar ti ariv a son pik ler en “leksplozyon bonm” ti anim stad e fer bokou kriye avek lazwa.  Plis ki en trantenn zenn zanfan arme sakenn avek en bonm, enn bann lenstriman mizikal ki’n tou-l-tan ganny asosye avek defen Ton Pa, ti mont lo lasenn e montre ki zot osi zot kapab fer. Spektak ti termin avek en performans par Patrick Victor e en ladans senfoni tradisyonnel ki ti vwar en melanz son e tanperaman profon lam Kreol.

Tou dimoun ti apre devid kot "Water Front Park" ki ti’n transform dan en restoran Kreol kot en varyete manze tre goute ti pe ganny vann dan bann stòl. Ti osi annan lenz anvant.

Spektak ti enkli bokou ladans

LINKS