Divizyon Gouvernman Lokal dan Minister Gouvernman Lokal, Spor ek Kiltir in entrodwir en nouvo progranm, apele Local Initiative Awards, kot bann volonter ki'n partisip aktivman e ki'n pli byen devoue dan bann aktivite kominoter lo nivo distrik i ganny rekonpanse pour zot devosyon.                      

Anse Boileau ti premye distrik pour prezant bann awards avek bann volonter ki'n pli byen travay, devoue e partisip dan bann diferan aktivite ki sa distrik ti organize lannen pase.

Sa ti ganny fer dan en rankont resaman dan Sant Kominoter Anse Boileau.

Bann pri ti varye e sa ti enkli larzan, sertifika e bann trofe sponsor par Minister Gouvernman Lokal.   

Dapre Zofisye ki ansarz devlopman bann progranm lavi kominoter dan Minister Gouvernman Lokal, Spor ek Kiltir, Msye Daniel Kallee, sa bann diferan kategori dan ki sa bann dimoun in partisipe e fer zot ganny sa bann awards i varye, tel ki sportif e rekreasyonnel, bann proze e servis kominoter, lar e kiltir, bann sevis dirzans dan bann ka dezas, parmi lezot ankor.

I ti osi fer resorti ki sa lannen Divizyon Gouvernman Lokal pe met lanfaz kot tou bann ladministrater distrik pou bezwen met en striktir anplas o komansman lannen kot zot pou swiv de pre bann dimoun ki promot bann progranm kominoter e alafen lannen ler bann distrik i fer zot parti anyel, zot a profite pour donn pri sa bann ki'n fer pli byen.

Touzour dapre Msye Kallee, sa progranm prezantasyon bann awards avek bann dimoun ki'n partisip pli byen dan bann aktivite kominoter pou vin en levennman anyel.

LINKS