Viziter kot legzibisyon zis apre seremoni louvertir Lendi

En varyete lapentir kolore, lobze tradisyonnel, portre e travay artizanal ki rann omaz diferan laspe kiltir kreol i konteni en legzibisyon lar ki pe pran plas dan Galeri Lar dan kad 18enm edisyon Festival Kreol.

Sa legzibisyon ti ofisyelman ouver par Minis pour Lasante Msye Patrick Pillay dan prezans Minis pour Lar ek Kiltir Maurice Msye Motee Ramdas, Minis pour Gouvernman Lokal, Spor ek Kiltir Madanm Sylvette Pool, o zofisye gouvernman ensi ki bann envite.

Pandan son ladres Minis Pillay ti dir ki en tel legzibisyon i en bon linisyativ vi ki plizyer zenn in partisip avek bann travay ki tourn otour bann metye tradisyonnel ki manifeste kwa ki ti ganny fer dan bann tan lontan.

"Nou ki responsab pour developman kiltirel, nou konman bann dimoun ki bezwen pran desizyon i nou devwar pour fer sir ki bann zenn pa obliye ki ti pase pa zis lo laspe ekonomik me osi la kote artistik e konesans teknik," minis ti dir.

I ti osi fer resorti ki atraver sa legzibisyon i annan bokou travay ki kapab edik bann zenn.

Sa legzibisyon ki ris avek bann travay ki demontre en kiltir tipikman kreol in ganny kategorize dan diferan seksyon ki enkli metye tradisyonnel, larsitektir Kreol, levolisyon lanmizik e travay lar tel ki lapentir.

Lo kote metye tradisyonnel i en varyete portre ek lenformasyon lo diferan metye ki ti egziste lontan, serten parmi ki'n disparet ozordi tel ki tir gwano e bat kannel.

Sa kategori i osi demontre bann lobze ansyen tel ki lagreg, lalanp e vye larozwar an ferblan.

Osi an egzibit i en koleksyon portre bann lakaz avek en larsitektir ansyen ki egziste lo Mahe, Praslin e La Digue. Laplipar sa bann lakaz ti ganny konstrir an dibwa ouswa borde ek tol. Sa seksyon pe osi montre en video ki en konpilasyon portre bann lakaz ansyen avek leksplikasyon.

Seksyon konsernan lanmizik, anba tenm ÔYerÉ OzordiÕ, i tras enpe listwar lanmizik tradisyonnel fas a bann lenflians afriken e eropeen. I osi annan lenformasyon lo bann diferan stil ek lenstriman lanmizik atraver Losean Endyen tel ki moutya, sega, sokwe e bonm.

Sa legzibisyon i osi rann omaz bann pionye lanmizik dan Seychelles tel ki Jacob Marie koni konman Ton Pa, Paquerette Labrosse/ Ken Accouche, Michael John Mancham mye koni koman Mickey, zis pour nonm enn de.

LINKS