Lider SPPF, Msye France Albert René, in envit tou bann voter pour fer en bon refleksyon avan zot ale vote mwa prosen, pour evite tonm dan latrap lopozisyon.

Dans sa konteks, i ti eksplike ki nou devret konpran atraver manev lopozisyon ki pe dir ki fodre "balans latab".

"Balans latab se kwa ? Balans latab, se met bar dan larou sa ki pep Seselwa i oule fer. Zot oule ki ler gouvernman in met an viger serten son progranm, zot annan kapasite dan Lasanble Nasyonnal pour zot anpes nou fer sa", i ti dir.

I ti osi dir ki atraver sa, lopozisyon i oule fer sir ki SPPF pa reisi progranm ki'n promet pep Seselwa. Me dapre Msye René, Seselwa lannen 2002 i pa bet, e i pou war klerman atraver sa manev.

"Seselwa pou war ki dan lopozisyon nou annan dimoun ki oule zis anpes nou mars annavan", i ti fer remarke.

Sa PPB ti lokazyon pour lider SPPF eksplik bann prensip son parti e donn lasirans tou bann keksoz ki SPPF pou fer. I ti dir par egzanp ki SPPF i oule konstrir en sosyete sosyalis, savedir en sistenm kot ou fer sir ki dimoun ki pa kapab travay, i ganny siporte par bann dimoun ki pe travay e ki ofer ledikasyon ek lasante gratwi avek son bann dimoun, anmenmtan ki i pe get dan byennet son vye dimoun.

"Sa se baz SPPF, e napa okenn parti dan Sesel ki annan sa bann prensip", i ti dir.

E se dapre sa bann prensip ki SPPF i donn sa bann lasirans swivan :

n ki nou bann zanfan pou kontinyen annan en bon ledikasyon pour nanryen;

n ki nou malad pou kontinye ganny swen pour nanryen;

n ki nou bann zanfan ki anvi al etidye deor e ki napa posibilite pour zot peye zot menm zot ganny sa ledikasyon pour nanryen;

n e ki nou bann vye dimoun pou kontinyen viv en lavi ere e trankil.

Msye ti profit sa PPB  pour met o-kler serten kontradiksyon dan sa ki lopozisyon i dir.

"Zot dir ki zot pou kontinyen donn lakaz dimoun, zot pou kontinyen ed zanfan ganny ledikasyon pour nanryen. Me si ou egzamin byen ki ou war ? Se ki, menm dan sistenm ki nou annan ozordi, sa menm dimoun, zot zanfan i al dan Lekol Endepandan. Zot zanfan i ganny tou kalite loportinite ki kekfwa lezot zanfan pa kapab gannyen selon zot. Zot pe kree en sistenm elitis, setadir en sistenm kot dimoun ki annan larzan pou fer byen, e dimoun ki ankor pe devlope,  dimoun ki napa otan larzan ki zot pou tonm deryer", i ti dir.

I ti osi kontinyen an dizan :

"SPPF i ganny dir souvan ki nou pa pe fer ase lakaz, ki nou devret fer plis lakaz. E sa menm bann dimoun ki pe dir sa, i dir nou osi ki nou bezwen rann later ki nou'n pran avek bann gran gran propryeter lontan. Zot dir nou osi ki nou pa bezwen fer konblaz. Me lo kwa ki nou pou fer sa bann lakaz", i ti demande.

Lider SPPF ti dir ki tousala i bann keksoz ki Seselwa i bezwen reflesir lo la seryezman dan sa eleksyon ki pe vini.

I ti dir ki nou bezwen fer refleksyon lo nou pase, lo nou prezan e lo nou lavenir.

"Nou bezwe seryezman demann nou lekor ki sa parti ki pou kapab donn zot lasirans ki i pou anmenn zot dan sa lavi modern", i ti dir.

I ti osi dir ki SPPF in deza met an plas bann baz neseser pour ki nou zenn i get lavenir avek konfyans.

"SPPF in met an plas bann baz neseser pour ki nou zenn i kapab avans avek konfyans dan sa nouvo lemonn ki pe ganny kree. Zenn in ganny son baz entelektyel e ozordi i kapab rantre dan sa lemonn elektronik, dan sa lemonn syantifik, avek konfyans e SPPF pou toultan la pour fer sir ki nou siport zot, ki nou donn zot backing e finans neseser pour zot kapab kontinyen mars annavan, pour zot kapab vin avangard dan sa devlopman modern ki pe arive pour ki, parey nou dir, be what you want to be, i ti dir.

"Mon krwar ki sa i enportan ki nou met en kantite lanfaz lo la e ki dimoun pa al vote zis pour bann enbesilite, zis pour fer krwar ki nou bezwen balans latab", i ti osi soulinyen a lokazyon sa PPB.

Dapre Msye René depi eleksyon prezidansyel, SPPF in asize e in reflesir ankor plis ki mannyer anmenn Sesel pli devan ankor e ki mannyer fer Seselwa viv en lavi ankor pli satisfezan e pli zwaye.

"Ozordi, nou krwar ki nou'n ariv lo sa staz kot tou bann plan in fini pare. Ozordi, nou'n pare osi pour avans ankor pli devan. Ou, ou kapab kont lo nou e nou kont lo ou", i ti dir.

LINKS