Lider Parti SDA (Social Democratic Alliance), Msye Clifford Reginald, sel kandida sa parti pour eleksyon Lasanble Nasyonal ki pou fer sa semenn, in dir ki fodre pa ziz en kandida par groser son parti.

Msye Reginald, ki pe debout pour distrik Beau Vallon, ti dir dan son diskour klotir kanpanny lo radyo Sanmdi swar ki fodre vot pour "en dimoun ki ou pou kapab koz avek, kritike san lafreyer e ki pou pran ou lopinyon an konsiderasyon."

"Tou MNA (Manm Lasanble Nasyonal) i annan en vot dan lasanble parey," i ti fer remarke.

Dan sa eleksyon, i ti eksplike, son parti pe met son fondasyon akoz SDA i en pti parti.

Sepandan, keksoz ki sir, i ti dir, se ki son parti "pa pou mor an nesan akoz nou parti i annan en rol pour zwe dan sa bann zour e lannen ki pe vini."

Dapre Msye Reginald, sa trwa gran parti Seychelles konmela "pa kapab vreman ofer sa pep en meyer lavenir akoz parol pa ale avek zot aksyon. Dimoun deplizanpli pe ganny difikilte pour kwar dan zot."

Selon li, "SPPF pe kontinyelman sanz son filozofi lo preski tou keksoz", "Parti Demokratik li in deza ganny sans prouv son lekor dan gouvernman e dan lopozisyon, me aksyon son bann dirizan in preski detri sa parti", tandis ki SNP son bann dirizan "pe fer bann fot politik e fer bann aksyon ki ferm tou bann laport negosiasyon avek SPPF ki annan kontrol gouvernman e sa pei pour en pe letan."

Sa sitiasyon politik an zeneral, dapre Msye Reginald, i fer ki Seselwa annantye pe ganny en move "deal" e se la kot son parti SDA i antre akoz i pe ouver laport pour tou Seselwa.

"Vyolans ek provokasyon pa akseptab dan en demokrasi," Msye Reginald ti dir, e azoute ki "dan Seychelles nou bezwen travay ansanm, nou napa lot swa. Lemonn in vin en vilaz e nou konman en pti kominote, nou pa kapab divize e disperse sansan nou pou perdi ou disparet."

Msye Reginald ti azoute: "Fodre ki nou travay ansanm. I annan plas pour nou tou anba soley Seychelles. In ler pour nou met nou lafyerte dekote, pa les pouvwar politik fer nou aveg e sourd."

I ti dir ki dan Seychelles i annan en kantite Seselwa talante dan zot prop fason, e pei nepli kapab zis ignor zot e ferm laport dan zot figir.

"En gouvernman responsab e determinen i devret dekouver e devlop tou potansyel nou bann dimoun," i ti dir.

Msye Reginald ti dir ki i annan tro bokou travayer etranze dan nou pei. "Fodre ki gouvernman i adres sa problenm. Nou annan ase dimoun ki kalifye pour fer marse tou nou bann lenfrastriktir. Fodre ki Seselwa i pas avan," i ti dir.

Sepandan i ti osi demande ki travayer Seselwa i osi pran son responsabilite akoz "si nou pa fer sa tou nou forex pou al avek etranze e devlopman ekonomik nou pei pa pou anmenn okenn benefis pour nou."

Msye Reginald ti dir ki le 7 Desanm ler soley pou leve, "annou met sa rezilta eleksyon deryer nou pour lanmour Seychelles. Viktwar pa toultan pour sa enn ki sorti premye. Le 7 Desanm annou dedye nou viktwar pour Seychelles e pour tou Seselwa."

I ti dir ki dan politik pa sipoze annan lennmi me senpleman bann oponan.

LINKS