Frer ek ser seselwa, byento zot pou annan loportinite egzers ankor enn fwa zot drwa pou swazir zot reprezantan dan lasanble nasyonal. Sa i en lokazyon enportan dan en sosyete demokratik. Legliz Katolik dan Sesel i oule profit sa moman pour eksplik pep Seselwa ki son pozisyon viz-a-vi lavi politik.

Lobzektif sa lartik se pou montre akoz ki bann manm Legliz i annan drwa partisip dan larealite politik. An menm tan, nou oule eksplike akoz ki bann premye responsab dan Legliz (levek, pret, dyak, relizye ek relizyez) zot pa angaze aktivman dan propagann an faver en parti politik. Finalman, nou ava met o kler ki kalite relasyon i annan ant Legliz Katolik ek Gouvernman en pei.

Nou pe propoz zot sa refleksyon an de parti. Ozordi nou pou vwar sans langazman politik ki bann manm Legliz Katolik zot egzerse dan lasosyete. Semenn prosen nou a vin lo rol Legliz viz-a-vi Gouvernman en pei. Nou priye e espere ki sa kontribisyon i ava ede dan ledikasyon nou pep.

Valer lavi imen

Legliz Katolik i krwar ki lavi imen i sakre. Sak dimoun i inik e i annan son lenportans koman en manm lasosyete. Pour Legliz, sak imen i annan en valer ki bezwen ganny respekte akoz sakenn i annan en morso lavi Bondye dan li. Tou dimoun – enkli bann avek dezabilite – i merit ganny respekte akoz Bondye, an premye, i’n montre son lanmour pour limanite. Baze lo temwanyaz Zezi Kri ki envit tou dimoun pour kontan Bondye e kontan son prosen (Matye 22, 34-40), Legliz i atas bokou lenportans lo lafason ki sa parol Levanzil i ganny met an pratik dan lasosyete.

I dan sa lespri ki Legliz i port en gran lentere lo lafason ki lavi imen i ganny organize dan tou son laspe : sosyal, kiltirel, ekonomik, politik, spirityel… Sak batize i ganny envite pou anmenn son kontribisyon pour promouvwar byennet lasosyete, atraver devlopman sak dimoun, dan tou son dimansyon. Legliz i krwar ki vre devlopman imen e spirityel i selman kapab ganny fer dan en lanvironnman lape, lazistis ek respe pour lavi ki Bondye i’n donn nou.

Langazman politik

Bondye i’n osi konfye nou sa responsabilite pour ansarz later e organiz nou lavi an sosyete parey nou kapab lir dan premye liv Labib ( liv Lazenez 2, 28). Legliz i alors rekonnet valer langazman politik koman en servis ki ganny ofer anver bann sitwayen e anver lapatri. Lepap Paul VI i vwar lavi politik koman en mwayen enportan pour met an pratik lanmour pour nou prosen : “La politique est la plus haute forme de la charité”.

I pour sa rezon ki Legliz Katolik i ankouraz son bann manm pour angaz zot dan lavi politik. I les sakenn lib pou swazir ki parti politik i oule siporte a kondisyon ki sa parti i respekte bann prensip drwa imen ki Nasyon Ini i’n deklare.   Dayer, sa bann drwa ek responsabilite zot i’n ganny enspire par Levanzil!

Respe ant bann adverser

Dan lafason ki zot egzers sa langazman politik, lasazes Levanzil i envit zot pour respekte zot ladverser : “kontan zot lennmi e priy pour bann ki persekit zot” (Matye 5, 44). Lavyolans i anzandre plis vyolans. Levanzil i envit nou pou pardonnen. Si ou annan en bon nouvel politik anons li. I pa dan lespri Levanzil pour asasin zimaz ou ladverser pour ganny vot.

Travay en politisyen i en vokasyon nob kan i ganny fer dan en latitid responsab. Kan en tel langazman i ganny fer koman en servis pour en pep, e non par lentere personel, sa i permet en pei progrese.

Menm si en kandida pa ganny elekte, si i’n fer en kontribisyon onet, vre, zis e bon, i pa pou etonan ki son prop ladverser i repran menm proze. Son lide pou’n ganny en laviktwar e lasosyete pou benefisye. Kan en kandida i fer en kanpanny prop sa i fer grandir sans moral e patriotik en pep. An dot mo, si vreman ou kontan ou pep, ou pa pou kapab azir otreman.

Ser politisyen, anons zot progranm e les lepep laliberte, dan lape, pour fer son swa. I inikman dan sa latitid ki lazistis a ganny respekte, ki lademokrasi a grandi e ki sak parti politik ava annan menm sans dan bann eleksyon.

Frer ek ser, sa i premye parti nou kontribisyon dan sa refleksyon lo Legliz Katolik ek lavi politik. Semenn prosen nou pou vin lo rol Legliz koman en lenstitisyon dan son relasyon avek pouvwar politik.

LINKS