Dirizan Parti Demokratik (DP), Msye James Mancham, in demann tou son bann ansyen siporter ki ti vot pour en lot parti politik dan dernyen eleksyon, pour "retourn o-berkay" la ki DP pe demontre son "determinasyon ek efikasite".

Dan son ladres pour lans kanpanny lo radyo, Msye Mancham ti demann avek bann elektora pour fer li konfyans ki sa ki i pe rode se pa pour li me pour lentere pep Seselwa ozordi e pour lavenir.

"Se dan sa lespri de lizye lo lepase e sis lizye lo lavenir ki nou kapab ansanm viv dan en pei de larmoni fraternel e en Seychelles ini pour kree son pli gran laglwar e non pa en Seychelles divize kont limenm," Msye Mancham ti dir.

Dirizan DP ti eksplike ki bokou pa ti konpran "rol konplike" ki i ti bezwen zwe e bokou pa ti realize ki ti enportan pour lentere nasyonal ki i ti azir konman en zonm deta (statesman) e pa senpleman konman en politisyen ki swaf pouvwar.

I ti dir ki sa i rezon akoz bokou ti ganny konfize, sirtou avek propagann en lot parti politik ki ti le atir zot ver "klib saboule e klib konfrontasyon".

Dapre Msye Mancham, ler i ti retourn Seychelles an Avril 1992 apre plizyer lannen an egzil, pei ti divize e "nou ti pe viv dan en latmosfer laenn ek lafreyer".

"Ozordi tou dimoun de bonn volonte i devret rekonnet kontribisyon vital ki nou politik rekonsilyasyon nasyonal in anmennen dan lavi nou nasyon," Msye mancham ti dir. 

I ti fer remarke ki si DP pa ti partisip dan dernyen eleksyon, se akoz i ti oule donn en lokazyon pep Seselwa pour reflesir e realize lavaler e nesesite politik rekonsilyasyon nasyonal dan nou pei.

I ti dir ki dernyen eleksyon prezidansyel ti demontre danze pour lentere nasyonal en kanpanny "konfrontasyon visye" ant en parti ki oule reste opouvwar par tou mwayen e en lot parti ki oule pouvwar a tou pri.

I ti dir ki sa swar letan rezilta ti anonse, Seselwa avek lentelizans e bonn volonte ti demann zot lekor ki pou arive avek nou pti pei si enn oubyen lot parti ti ganny sakenn 50 poursan.

"A traver sa refleksyon, zot ti konklir ki, dan lentere nasyonal, ler in arive pour revitaliz e reorganiz Parti Demokratik lo en baz nou trwa gran slogan ki: De lizye lo lepase, sis lizye lo lavenir; Sanzman san vyolans, e Zot annou met dolar dan pos Kreol," Msye Mancham ti dir.

Dirizan DP in dir ki son parti i kwar ki nou lavenir se en keksoz ki nou bezwen kree nou menm, setadir ki se bann desizyon ki nou pran ozordi e bann aksyon ki nou fer ki pou determin kalite nou lavenir.

"Si ou plant loyo mang ou pou rekolte en pye mang; si ou plant manyok dou, ou pou rekolte manyok dou e si ou plant manyok anmer, ou pou rekolte manyok anmer. Par menn fason, si nou plant laenn, konfrontasyon ek konfisyon, nou pou rekolte plis laenn, plis konfrontasyon e plis konfizyon," Msye Mancham ti dir.

Avan termin son ladres, Msye Mancham ti fer resorti ki si son parti i pour rekonsilyasyon nasyonal, i osi en parti ki touzour pre pour fer rekonsilyasyon familyal.

"Tou bann ki annan leker demokratik e ki ti vot pour en lot parti dan dernyen eleksyon, retourn o-berkay la ki Parti Demokratik pe demontre son determinasyon e son efikasite.

Dirizan DP ti dir ki dan son dernyen ladres politik le 30 Novanm, i pou konsantre lo bann gran laliny politik son parti, selon li pour demontre akoz DP i meyer parti pour Seychelles dan lavenir.

LINKS