Atraver son progranm pour Eleksyon Lezislativ 2002 ki apel 'En Lasanble pour nasyon antye', SNP, dapre son lider Msye Wavel Ramkalawan, "i anvi donn lepep Seselwa son langazman pour kontinyen travay afen ki nou viv dan lape, afen ki nou pei i konn progre e ki lazistis i rennyen pour tou dimoun, pour tou zabitan."

Msye Ramkalawan ti dir dan son diskour pour lans kanpanny lo radyo ki apre10 an tou Seselwa i konnen ki en Lasanble Nasyonal i vreman enportan akoz se dan sa lenstitisyon ki tou bann lalwa ki gouvern pei i ganny aprouve, landrwa kot bann mosyon i ganny prezante avek lespwar ki lavi limenm li i amelyore, e landrwa kot bann size ki pou ed pei dan nou devlopman ekonomik i osi ganny  debat.

I ti dir ki pour sa eleksyon, SNP i prezant son progranm 'En Lasanble pour nasyon antye' ki, selon li, i en kontra atraver lekel "nou a pe dir ou konman en voter ki nou pou fer sir nou ganny elekte an mazorite dan Lasanble Nasyonal."

Sa i ti dir, se pour ki voter i konnen egzakteman kwa ki sa parti pe prezante, afen ki letan zot pran zot desizyon zot konnen ki zot pe pran en desizyon konsansye.

Dapre Msye Ramkalawan, en pei i bezwen en Lasanble Nasyonal ki reprezant lepep Seselwa an antye e "sa i bezwen en Lasanble ki apropriye pour en sistem demokratik ki modern."

Si SNP i ganny en mazorite dan Lasanble sa parti pou "dedye son lekor pour kree en Lasanble Nasyonal ki reste toultan en lavwa pour tou Seselwa, ... en Lasanble ki pou fer en diferans dan nou lavi toulezour, e parlao tou en Lasanble ki travay."

I ti dir: "Mwan konman dirizan SNP, mon pe vin devan zot pour ki zot donn nou sa sipor pour nou fer sa bann sanzman arive."

Msye Ramkalawan ti answit konplent akoz pandan sa dernyen 10 an serten bann mosyon ki son parti ti prezante, ki i ti dekrir konman bann "bon mosyon", pa ti ganny aprouve par Lasanble.

Dapre li sa bann mosyon pa ti ganny aprouve akoz "olye rod lentere pour lepep an antye, bokou bann manm ti vin rod zot prop lentere."

"Nou dan SNP nou senpleman anvi travay pour nou pei, e se la kot nou anvi en Lasanble ki efektiv, en Lasanble ki vreman pran a ker bann mosyon ki pou konsern nou pei, ki letan en lalwa i pase i pa ava en lalwa ki aplik zis pour serten dimoun, me ki tou dimoun i ava tonm anba sa lalwa," Msye Ramkalawan ti dir.

Lo lezot pwen an relasyon avek Eleksyon Lezislativ e son (Msye Ramkalawan) analiz lo sitiasyon dan pei an zeneral, lider SNP ti dir ki "fodre ki tou Seselwa i ganny menm loportinite dan son pei, malgre son parti politik ki i siporte, e sa ozordi i reste enn bann pwen enportan dan sa ki nou anvi prezante avek en mazorite dan Lasanble."

I ti dir ki SNP i anvi ki "politik i sorti dan bokou keksoz" e ki se "bezwen en dimoun ki pas premye."

I ti koz lo pri lavi andizan ki son parti pou anmenn bann mosyon ki a fer desann pri lavi.

Lo sitiasyon ekonomik i ti dir "sa ozordi i en keksoz ki pe trakas nou tou." Dapre li tro souvan "avek sa sistenm politik, partou kote nou trouv bann envestiser vin Seychelles e apre, akoz tou keksoz i lo en laliny politik, bokou i retournen."

I ti dir ki son parti i kwar ki "fodre ki tou dimoun ki konsernen avek nou lekonomi i kapab asiz ansanm, diskite e vwar ki meyer semen ki nou pou pran."

I ti azoute: "Nou kwar ki letan nou ava asize ansanm, diskite, analize, la nou ava nobou trouv en semen ki ava anmenn nou ver prosperite ekonomik e sa a fer ki tou dimoun i a viv byen."

Lo son refleksyon lo lapolis, dapre li, ozordi zour dimoun "napa gran konfyans dan sa lafors" e son parti pe dir ki " fodre nou rekonstri nou lafors lapolis."

SNP, Msye Ramkalawan ti dir, " i anvi travay pour ki nou pei i ganny sa ki meyer, ki ou lavwa i ganny antann e ki nou zanfan e nou pti zanfan demen a viv dan en Seychelles prospere, en Seychelles ki gou e en Seychelles kot nou tou nou pou viv dan lape."

LINKS