Bernod Cedras enn bann santer Seselwa i an se moman dan en gran sagren apre ki in perdi  “master copy” son nouvo albonm ki ti sipoze al lo marse lafendimwan.

Dapre Bernod sa lensidan in ariv apre lanmor David Payet an Desanm lannen pase. David ti teknisyen ki ti anrezistre e miks albonm Bernod.

Bernod ti eksplik avek zournal Nasyon boner sa semenn, ki son albonm ki apel Mersi Bokou ti’n fini rikorde e son kouvertir ti’n fini fer. I ti dir ki le 24 Desanm pandan ki i ti pe perform dan en fonksyon, David ti enform li par telefonn ki son "master" ti'n pare, me vi ki i ti pe zwe, i ti dir David i a pas pran apre.

I ti azoute ki apre lanmor David son semenn answit, i ti demann bann frer David si zot pa’n apersevwar son "master". Me ziska prezan Bernod ti dir ki i p'ankor war son "master" pour li kapab lans son albonm. I ti menm al sers serten lekipman lanrezistreman dan stoudyo David e anmenn kot en lot stoudyo pour regarde si son bann sanson pa ti lo la, me tousala ti anven.

Bernod ti dir ki sa in kout li tre ser e ki i ti’n fer bokou depans pour son travay.

“Mon vreman sagren sa ki’n arive e mon zis anvi retrouv mon 'master'," i ti dir.

I ti dir ki i pa pe blanm personn pour sa ki'n arive akoz i posib ki en dimoun in kapab ranmas sa "master" par aksidan, e si sa i leka i ti ava apresye si zot ti ava retourn son travay avek li.

Bernod ti dir ki lo son albonm i ti’n ganny lasistans vokal Jenny De Letourdie e bann mizisyen tel ki Bruce, Mervin, Danny e Jose ti’n akonpanny li e tousala in kout li larzan.

Bernod ti dir ki i ti pe vreman esper son albonm sorti e la si i pa reisi retrouv son "master" i pou bezwen refer tou sa lanrezistreman, repey bann mizisyen, stoudyo, ki pou kout li bokou larzan.

LINKS