Dapre lider e osi sel kandida parti Social Democratic Alliance (SDA) ki pe konteste prosen eleksyon Lasanble Nasyonal, Msye Clifford Reginald, in plis ki ler pour vir en nouvo paz dan listwar Seychelles e pour konmans en nouvo sapit kot dimoun i fran, onnet e determinen.

Letan i ti pe koze Zedi, Msye Reginald ti osi fer remarke ki son parti pe stratezikman servi eleksyon Lasanble Nasyonal sa lannen pour prepar fondasyon pour sa enn pli enportan an 2006.

Sa zenn onm, aze 46, pe konteste en plas dan Lasanble dan distrik Beau Vallon akote kandida Maxwell Julie (SPPF), Collin Dyer (SNP) ek Paul Chow (DP).

Msye Reginald, ki'n en zabitan Beau Vallon pour sa dernyen 20 an, ti pli boner sa lannen ganny nonmen koman lider SDA apre ki fondater parti, Msye Guy Morel, ti deside pas labar avek en nouvo zenerasyon.

Parti SDA pe konteste zis en distrik pour sa eleksyon akoz dapre Msye Reginald, dimoun pe prefere kit zot a lekar akoz sa ki in apel "problenm viktimizasyon." Anplis, i ti dir, tro bokou larzan pe ganny verse dan politik Seychelles e sa son parti pa dakor ditou avek.

Msye Reginald ti answit dir ki larantre SDA dan sa eleksyon i senpleman en fason pour prepar en fondasyon solid oubyen en platform ki pou met sa parti dan en pli bon pozisyon pour eleksyon 2006.

Sa kandida ti dir ki kontrerman avek sa ki bokou dimoun pe krwar, sa enn eleksyon i pa pou deside lekel parti ki monte oubyen reste o pouvwar. Sa eleksyon, i ti eksplike, i plito pour deside lekel ki pou reprezant sak distrik dan Lasanble.

Msye Reginald ti dir ki an sa ki konsern li, i santi ki i kapab fer en diferans pour bann zabitan Beau Vallon e ki deza atraver son kanpanny, i annan en gran diferans ant li avek lezot kandida.

I ti demann bann zabitan Beau Vallon pour mazin byen avan zot met zot vot dan bwat e pour get Clifford Reginald konman en zonm for e ki kapab reprezant zot lentere dan Lasanble.

"Mon pa en zonm parfe, mon annan mon febles parey tou dimoun, alors mon pa pe promet zot ki mon pou fer mirak me sa ki mon kapab fer se reprezant zot lentere ek lentere nou distrik dan Lasanble," i ti dir bann voter dan son distrik.

Msye Reginald ti dekri sitiasyon politik dan Seychelles konman enn kot zis gouvernman ki o-pouvwar ki kapab met bann progranm anmars tel parey progranm lakaz ou semen. Alors, i ti fer resorti, sel keksoz ki li i kapab fer konman en kandida ki pa pe ganny okenn sipor parey, se reprezant lentere son bann frer ek ser.

Msye Reginald ti dir ki pour tro bokou lannen bann politisyen in "malonnet ek sa pep e ki zot in esey tou fason fer nou krwar lizour o lannmen". I ti dir ki lepep Seselwa, sirtou zabitan Beau Vallon, in ganny ase avek tousala e aprezan zot oule vwar nouvo politisyen ki annan entegrite.

I ti azoute ki si i ganny elekte e plitar li osi i tonm dan sa pyez, alors i pou bezwen demisyonnen konman Manm Lasanble Nasyonal (MNA) pour sa distrik.

"Donn mwan en koudmen e ansanm nou ava avans devan e anmenn nou pei devan dan lanmour ek respe pour tou dimoun," Msye Reginald ti demande.

Dapre Msye Reginald dimoun ki kontan zot pei e ki annan sa lanvi pour fer en diferans fodre zot zwenn SDA.

An dizan ki okenn parti p'ankor pare pour domin lasenn politik Seychelels endepandaman, Msye Reginald ti dir ki sa i ava selman arive letan en nouvo zenerasyon politisyen i vin devan e montre respe e montre ki zot konpran bann vre prensip demokrasi.

Alors, se pour sa rezon, i ti dir, akoz i pe travay pour "remet pouvwar dan lanmen lepep" akoz dapre li, "sa ki voter i donnen, i kapab repran trankilman."

Msye Reginald ti demann lepep pour fer en bon swa, an dizan ki SDA osi i anfaver sanzman me ki sa sanzman i devret ganny fer dan lape ek dan lord.

LINKS