"Lavansman materyel i pa tou. Grander en zonm pa ganny mezire par sa ki i posede me par son bann bon valer moral."

Sa ti ganny fer resorti par bann manm ki ti pran laparol dan Lasanble Nasyonal Vandredi 27 Fevriye bomaten letan zot ti pe donn zot reaksyon lo diskour Leta Lanasyon fer par Prezidan France Albert Rene son Mardi avan.

Bann manm ki ti koze ti enkli Onorab Terence Mondon, Nicholas Prea, Daisy Rath, Isabelle Joubert, Annette Georges e Francis Cupidon.

Ler i ti pe koz lo merit sa tenm ki Prezidan Rene in dedye sa lannen, Renesans Moral, Onorab Mondon ti dir ki avek tou sa ki nou'n akonpli fodre pa ki dan nou resers pour prosperite nou les perdi nou bann valer moral.

Nou bezwen plis ki en reisit materyel, i ti dir, e azoute ki dan devlopman en sosyete reisit moral i osi tre enportan. Se pour sa rezon, i ti dir, lepep i bezwen sa lannen reflesir tre seryezman lo sa tenm ki Prezidan Rene in swazir e met li an pratik dan zot lavi toulezour.

I ti lans en lapel avek pep Seselwa pour pasyante e pour annan lespwar ki sa letap difisil ki lekonomi pei pe pas ladan pou amelyore avek bann mezir ki'n ganny pran atraver Progranm Reform Makro-Ekonomik ki ti ganny enplimante lannen pase.

Onorab Joubert ti lans en lapel avek bann zenn pour ki zot pa bliye sa ki zot gran paran in fer pour tras sa semen progre kot ozordi zot pe zouir bokou prosperite.

Lo son kote Onorab Rath ti rekonfirm son sipor e sipor tou zabitan Au Cap pour travay ansanm avek Vis-Prezidan James Michel, dimoun ki Prezidan Rene in swazir pour ranplas li dan de trwa mwan ler i sorti o pouvwar. I ti dir ki malgre ki i sagren ki Prezidan Rene pe sorti o pouvwar i ti konvenki ki Vis-Prezidan Michel ti pe vin kontiny bann travay pour anmenn pei pli devan ankor.

Bann manm dan Lopozisyon enkli Onorab Prea, Annette Georges e Cupidon ti met lanfaz lo sa ki zot ti dir i vre leta nou nasyon ozordi.

Bann difikilte ekonomik ki zot ti dir in ganny koze par move gouvernans e koripsyon, pe ede pour fer moral sosyete degrade akoz dimoun i enserten lo zot lavenir.

LINKS