Prezidan Michel i satisfe avek fason La Digue pe devlope

Prezidan Michel pandan son rankont avek bann manm La Digue Development Board

Prezidan James Michel in felisit  La Digue Development Board (LDB) pour sa bon travay ki zot in komanse pour prezerv labote natirel ek kiltirel La Digue e demann zot pour kontinyen dan zot zefor pour fer sa zil bouz pli devan.

Prezidan Michel ti pe koz pandan en rankont ki i ti fer avek bann manm sa bord Dimans le 30 Me, kot Sant Kominoter sa zil.

Sa rankont in permet Prezidan Michel pour konn plis lo sa nouvo polisi ki bord in avek pour gid zot lo pli byen fason pour antreprann bann nouvo devlopman kot a kot avek proteksyon ek prezervasyon labote natirel ek larises kiltirel sa zil.

Sa rankont in donn Prezidan Michel loportinite pour osi konn laspirasyon bann Digwa.

I ti dir ki LDB in fer en travay remarkab pour ede gard sa lekilib ant proteksyon lanvironnman natirel e prezervasyon larises kiltirel sa zil avek bann nouvo devlopman.

Prezidan Michel ti osi felisit sa bord pour sa seri rankont ki zot in fer avek diferan sekter lekonomi sa zil pour konn zot laspirasyon ek dezir lo devlopman zot zil.

Sa, i ti dir, i en tre bon linisyativ ki a permet tou Digwa partisip dan sa devlopman.

Lo son kote Hansley Constance, tyermenn  LDB e osi Manm Lasanble pour La Digue ek bann zil pros, ti dir ki malgre serten kontrent, bord i pare pour kontinyen fer en bon travay pour ki La Digue i kontinyen devlope.

Msye Constance ti dir ki bord in osi vin avek en nouvo polisi, ki ti orizinalman fer par bann ansyen manm bord La Digue. Avek bann nouvo devlopman ki pe arive lo La Digue, sa nouvo bord in vwar li neseser pour fer serten sanzman avek sa polisi ki pou gid zot lo bann desizyon ki zot pran konsernan sa bann devlopman.

“Sa i vedir ki okenn desizyon ki bord oubyen lezot minister i pran pou bezwen anliny avek sa polisi,” Msye Constance ti dir.

Sa polisi, i ti dir, pou servi koman en baromet pour gid tou devlopman ki ganny fer lo sa zil.

Msye Constance ti dir ki sa seri rankont avek bann reprezantan popilasyon La Digue ti tre enteresan lefe ki bann Digwa ti tre aktiv e in annan bokou nide ki’n ganny met devan.

Antretan en premye draf sa polisi in fini ganny fer e draf final pou ganny prezante ankor enn fwa avek tou bann reprezantan popilasyon La Digue avan ki i ganny met devan gouvernman pour laprouvasyon.

Swivan son rankont avek LDB, Prezidan Michel ti osi zwenn bann siporter SPPF (Fron Progresis Pep Seychelles) dan en piknik ki ti’n ganny organize L’Union koman parti bann aktivite pour komemor 40enm laniverser SPUP - SPPF.

Prezidan Michel letan i ti pe rankontre siporter SPPF pandan piknik L'Union

LINKS