Zil La Digue ti an dey wikenn pase apre en doub mert. Sa lensidan trazik ti arive ant Vandredi swar ek Sanmdi granmaten (11-12 Zilyet).

Dapre port parol lapolis, Msye Jean Toussaint, kord gard La Digue ti ganny alerte ver minwi edmi ki de zonm ti'n ganny trouve mor.

Sa de zonm, Seraphin Payet aze 61 an ek Ronald Ladouceur ki dan son karantenn lannen, ti de zabitan Anse Réunion, La Digue.

Dapre lapolis, lekor Msye Ladouceur ti ganny trouve dan krwaze semen Anse Réunion ki mont Belle Vue kant a lekor Msye Payet ti ganny trouve anndan dan son lakaz.

Lapolis in dir ki Lucine Payet (madanm Seraphin) ti'n ansanm avek son fiy Penny kit zot lakour ver 8er aswar pou al kot lekor enn son kouzin, ki ti pe ekspoze. A sa moman son msye ti pe get televizyon.

Touzour dapre lapolis, letan Lucine ek son fiy ti retournen sorti kot lekor ver 9.30 aswar,  Msye Payet ti pe dormi.

Dapre lapolis, letan Lucine ek son fiy ti retourn ankor pour en dezyenm fwa kot lekor, zot pa ti ferm laport lakwizin avek lakle pour zot pa lev Msye Payet letan zot retournen sorti kot lekor.

Sete ver minwi letan Madanm Payet ek son fiy ti pe retourn kot zot ki, an arivan dan krwaze semen pour mont Belle Vue, en group dimoun ti dir zot ki i annan en lekor ater.

Apre ki zot ti vwar ki sa ti lekor Ronald, fiyel Msye Payet, Penny ti tay kot lakaz pour al kriy son papa.

Letan ki i ti ariv kot lakaz i ti vwar lekor son papa ater e i ti komans kriye.

Dapre lapolis, figir Ronald ti anfle e ble. I ti'n osi sibir koupe deryer son latet e ti annan disan par son nennen.

Kant a Msye Payet, ti annan mark blesir deryer son zorey kote gos e par lao son lizye gos.

Lekor Ronald Ladouceur e Seraphin Payet ti ganny transporte lopital La Digue apre lopital Baie Ste Anne, Praslin, dapre lapolis.

Lapolis in mobiliz son bann zofisye Criminal Investigation Division (CID), fingerprint  e osi bann dog handlers pour asiste dan lanket ki pe kontinyen.

LINKS