Minis pour Ledikasyon ek Lazenes, Msye Danny Faure, in lans en lapel pour ki plis dimoun i pibliy literatir kreol pour zanfan.

Sa bann louvraz, i ti dir, ava ganny servi koman sipor pour lansennyman lalang kreol e devlop sa gou pour zanfan lir Kreol e devlop zot kominikasyon ek konesans.

Minis Faure ti lans sa lapel dan Lasanble Nasyonal Mardi 14 Oktob, letan i ti reponn kestyon Manm Lasanble pour distrik Bel Ombre, Onorab Nicholas Prea, lo si son minister i annan okenn plan pour revwar lansennyman Kreol dan lekol primer.

Minis Faure ti dir ki dan tou lekol primer dan Seychelles trwa lalang nasyonal ­– Angle, Franse ek Kreol ­- i ganny ansennyen me i ti tou-d-menm dir ki Kreol, ki ganny montre koman en lalang depi lakres ziska P2, i osi ganny servi koman en mwayen pour lansennyman lezot size parey Matematik, Lasyans ek Letid Sosyal.

Kreol, i ti azoute, i osi ganny servi koman en lalang sipor dan lansennyman a tou nivo dan lekol primer pour konsolidasyon ek leksplikasyon serten konsep ouswa serten terminolozi ki kapab koz serten difikilte dan laprantisaz.

Touzour dapre Minis Faure, bann lengwis ek eksper dan ledikasyon in prouve atraver plizyer letid ki lansennyman dan lalang maternel i kapab servi fasilman e se atraver sa ki bann premye konsep i kapab ganny formen e devlope dan bann zanfan.

Minis Faure ti eksplike ki dan laklas P3 ziska P6 Kreol i ganny ansennyen parey en lalang e servi koman mwayen laprantisaz pour serten size parey Ledikasyon Sosyal e Personnel, Ledikasyon Fizik, Lanmizik, Larelizyon ek Lar.

I ti dir ki lansennyman Kreol dan bann lekol primer in vin apre bann rekomandasyon ki en komite apwente an an1994 par Minister Ledikasyon ti revwar polisi lansennyman bann lalang dan lekol Seychelles.

Parmi bann rekomandasyon sa komite ti vwar nesesite pour komans avek Angle koman medium pli boner o nivo P3, ki ti ganny met an mars an 1997 e ki ankor pe fonksyonnen ziska prezan.

Dapre Minis Faure, bann letid ki'n ganny fer resaman an relasyon avek ledikasyon primer e rezilta en resansman ki ti fer avek zanfan menm laz dan 15 pei Lafrik in montre ki zanfan lekol primer Seychelles i fer pli byen lo nivo laprantisaz lektir Angle ki bann dan lezot pei parey Zambia ek Lesotho.

Minis ti dir ki menm si son minister i satisfe avek lafason ki Kreol pe ganny servi dan lansennyman koman en lalang, en mwayen lansennyman e koman en lalang sipor, zot pe rod meyer fason pour donn sa lalang nasyonal son vre stati e konsolid son lenportans dan lansennyman.

I ti dir ki son minister pe entansifye zefor pour fer ki bann zanfan i ganny akse avek resours pour ede devlop e revey zot lentere. Par egzanp bokou pe ganny fer pour ki bann resours i ganny prodwir lokalman e i dan plan pour ki prodiksyon i lo en o nivo e ki bannn liv legzersis, lektir i ganny revize pli souvan, pour fer sir ki zot konteni i adapte avek sanzman ek progre dan sosyete Seselwa.

Bann ansennyan, i ti dir, pe osi ganny formasyon dan pli meyer fason montre zanfan lir e ekrir sa lalang. Zot pe aprann nouvo teknik ek stratezi pour rann lansennyman an kreol pli enteresan pour ki zanfan i devlop zot konpetans dan sa lalang

LINKS