Minis pour Tourizm ek Transpor, Madanm Simone De Comarmond, in lans en lapel pour ki plis drayver taksi i zwenn Lasosiasyon Operater Taksi e demann zot pour pran zot louvraz pli o-serye pour en pli bon devlopman lendistri tourizm.

Minis De Comarmond ti lans sa lapel pandan en seremoni prezantasyon sertifika avek 43 drayver taksi ki ti'n konplet avek sikse en staz formasyon ki ti fer lannen pase.

Sa seremoni ti deroul kot Sant Konferans Enternasyonal Vandredi pase dan prezans  sekreter prensipal pour Transpor, Msye Gerard Lafortune; lezot zofisye Minister Tourizm ek Transpor; reprezantan Lotorite Laysenns Seychelles (SLA) e vis-tyermenn Lasosiasyon Drayver Taksi, Msye Godfrey Bonnelame – ki ti pe reprezant tyermenn sa lasosiasyon, Msye David Madeleine, ki pa dan pei.

Sa staz formasyon ki ti fer an Avril ek Novanm lannen pase pour de group drayver taksi,  ti annan pour bi amelyor kalite ek nivo servis ki bann drayver taksi i ofer e familyariz bann nouvo avek sa servis.

I ti ganny organize par Divizyon Transpor lo Later e kordinen par en enzenyer sinyor sa Divizyon, Msye Patrick Andre.

Bann size ki ti ganny aborde pandan sa staz ti enkli relasyon ek konportman drayver taksi anver kliyan, konnesans zeneral prodwi ek lenportans lendistri tourizm pour nou pei.

Animater sa staz formasyon ti plizyer reprezantan sorti kot bann minister ek lorganizasyon ki annan lyen direk avek sa servis parey Minister Tourizm ek Transpor, Minister Lanvironnman, Seychelles Institute of Management (SIM), SLA ek lezot lorganizasyon prive.

Bann partisipan ti osi ganny enformen lo pli bon fason pour fer marse zot biznes e konpran pli byen zot bann lobligasyon anba lalwa.

Dan en pti diskour kot seremoni prezantasyo sertifika, Minis De Comarmond ti enplor bann drayver taksi pour sanz zot move latitid ek konportman e pour atas plis lenportans avek zot travay, ki i ti dir i ekstrememan enportan pour nou lendistri tourizm.

"Lefe ki zot in deside pour fer en tel travay ki pa fasil, fodre zot pare pour fer fas avek bann diferan defi," Minis De Comarmond ti dir.

Avek bi ogmant lefikasite ek profesyonalizm dan sa domenn, minis ti dir ki dan lefitir zot pou vin pli strikt avek bann ki enterese zwenn sa profesyon.

Olye demande ki Lasosiasyon Operater Taksi pou fer pour zot, bann drayver i bezwen osi demande ki zot, zot kapab fer pour devlopman sa lasosiasyon, Minis De Comarmond ti dir.

Letan i ti pran laparol Msye Lafortune ti osi demann bann drayver taksi pour pran zot responsabilite pli o-serye e met bann laspe parey kourtwazi, zantiyes ek lonnekte avan tou pour zot kapab ofer en pli bon servis.

I ti dir i asire ki sa konnesans an plis ki zot in gannyen atraver sa formasyon in ekip zot avek bann zouti kominikasyon ek marketing neseser pour vin pli profesyonnel dan zot travay.

"Mon swete ki sa sertifika ki zot in resevwar pa reste zis en memwar zot partisipasyon dan sa kour me okontrer konmansman en nouvo letap dan zot karyer konman en vre drayver taksi ki nou anvi vwar," i ti azoute.

Msye Lafortune ti dir ki i ankouraze pour vwar ki sekter taksi, malgre ki i pa osi gran ki lezot sekter dan lendistri tourizm, i montre lantouzyasm pour siport sa minister dan son demars pour progrese e atenn bann lobzektif ki'n ganny met an plas pour donn en bon prodwi.

LINKS