Zenn lekol segonder Grand Anse Praslin ti met devan zot bann swe pour lavenir sa zil atraver en dyalog avek bann o zofisye dan gouvernman ki ti deroul Casino des Iles, Côte D'Or pandan wikenn.

Prezan kot sa deba ti Vis-Prezidan James Michel, Minis pour Ledikasyon ek Lazenes Msye Danny Faure, sekreter prensipal pour lazenes Alain Volcere, manm lasanble pour distrik Baie Ste Anne Madanm Mitcy Larue e osi manm lasanble pou Grand Anse Msye Norbert Lepathy.

Sete anba tenm "Praslin dan lavenir" ki Vis-Prezidan ti ouver deba, kot i ti demann bann zenn sa zil pour devwal zot bann panse ek rev pour Praslin.

I ti profite pour fer bann zenn rekonnet ki zot annan en gran rol pour zwe dan lavenir zot zil.

"I enportan ki non selman bann dimoun ki pli aze, zot paran e gouvernman limenm ki deside egzakteman ki mannyer Praslin pou ete dan lavenir me ki zot osi realize ki demen se zot ki pou vin bann sitwayen aktif dan sa sosyete," VP Michel ti dir.

I ti demande ki fodre ozordi menm zot konmans reflesir lo ki mannyer zot zil i devret ete dan lavenir.

Dan sa dyalog bann zenn ti profite pour lev plizyer size ki relye avek ledikasyon ek spor dan zot distrik. Bann demann tel ki en bibliotek santral, pli bon fasilite spor kot lekol, plis akse ek konpiter ti parmi bann swe ki zenn ti met devan.

Vis-Prezidan ti asir bann zenn ki i pou fer son mye pour met loportinite a dispozisyon bann zenn lo Praslin.

Lo son kote Msye Danny Faure ti anonse ki en bibliotek santral lo Praslin pou enn bann proze ki pou ganny enplimante.

Bann zenn dan lezot distrik lo Mahe, osi byen ki La Digue pou osi ganny sans partisip dan en tel dyalog.

LINKS