Minis pour Ledikasyon ek Lazenes, Danny Faure, in demann avek bann partisipan progranm alfabetizasyon pour pa aret zot letid, me okontrer pour persevere e kontinyen ziska en nivo pli avanse.

Minis Faure ti pe koz kot seremoni prezantasyon sertifika avek en santenn partisipan ki'n termin kour alfabetizasyon dan plizyer size parey Kreol, Angle, Matematik ek Franse.

Sa seremoni ki ti fer Vandredi le 19 Desanm, dan lasal Teat Nasyonal, Mont Fleuri, ti asiste par plizyer o-zofisye sa minister.

Minis Faure ti dir ki sa lannen in enn spesyal pour progranm alfabetizasyon dan Seychelles lefe ki an Septanm ti fer 25 an depi ki sa progranm in ganny  enplimante isi.

I ti dir ki sa seremoni prezantasyon sertifika i en temwanyaz ki si nou tou nou zwenn ansanm e siport gouvernman, nou pou kapab atenn sa target 100% to alfebitizasyon dan sa prosen di-z-an e lapel ki i ti osi fer pour mark Lazournen Enternasyonal Allfabeitzasyon boner sa lannen.

Alfabetizasyon i ti dir i ofer en kantite lespwar, i ouver en kantite laport, ofer laliberte e  liber lespri en endividi e i osi donn sans gou lavi.

Minis Faure ti dir ki malgre ki avan bann partisipan pa'n ganny sans benefisye atraver ledikasyon de baz oubyen zot pa'n ganny sans pourswiv letid pli avanse, lefe ki 139 sertifika ti ganny distribye i montre ki annan potansyel e ki zot kapab aprann. Serten partisipan in swiv de kour anmenmtan.

Minis Faure ti dir ki i fyer pou note ki deza 5 partisipan ki'n swiv kour alfabetizasyon avek sikse in deza anrezistre avec ALDEC pour swiv kour O-Level oubyen IGCSE lannen prosenn.

Lefe ki sikse progranm alfabetizasyon i depan en kantite lo staf ALDEC, bann kordinater ek lenstrikter alfabetizasyon, Minis ti profit sa lokazyon pou felisit zot pour zot bon travay ek devouman, ki in dir in fer en gran diferans dan lavi en kantite dimoun.

Avan terminen Minis Faure ti anonse ki sa lannen ALDEC in anrezistre pli o partisipasyon an term nonm adilt ki'n swiv bann diferan kour konpare avek 1999 kot ti annan mwens ki 700 partisipan. Sa lannen ALDEC in etabli en rikord 1,685 partisipan.

Lo son kote Madanm Fiona Ernesta-Uranie, Direkter ALDEC ti salye zefor bann partisipan pour met lakanmizri de kote e travay dir pour zot ariv kot zot ete ozordi.

I ti osi demann zot pou kontinyen lo sa bon semen ki zot in swazir pou kontinyen aprofondir zot konesans.

Madanm Ernesta-Uranie in osi envit bann adilt ek zenn ki pa dan lekol pou zwenn sa progranm.

Apard sertifika, bann partisipan ki'n fer pli byen lo diferan nivo dan bann diferan size ti osi ganny rekonpanse.

Christelle William (English Rive)r, Jeanette Moustache (Plaisance), Catherine Finesse (Baie Lazare) ti resevwar pri pour meyer partisipan pour Angle nivo 1, 2 ek 3 respektivman.

Meyer partisipan pour Kreol nivo 1 ti ranporte par Martine Lucie (Anse Royale) tandis ki Cecile Mein (Glacis) ek Madeleine Isaac (Ponite Larue) ti meyer pour nivo 2 ek 3 respektivman.

Pour Matemetik nivo 1 Andy Leon (English River) ti fer pli byen e de partisipan – Jenifer Laporte ek Elgine Victorin – sorti Silhouette ti meyer pour nivo 2. Sa i fer ki Claudette Labiche ti ranport pri pour nivo 3.

Marguerite Leon (Anse Boileau), Urzelle Payet (Baie Lazare) e Maggy Thoomas (Anse Boileau) ti meyer partisipan nivo 1,2 ek 3 respektivman pour Franse.

Lefe ki distrik Baie Lazare ti'n kapab anrezistre pli gran nonm partisipan (13), ankouraz plis nouvo manm pour zwenn bann diferan laklas e osi gard en meyer attendance, sa ti fer zot resevwar Minister's Cup, ki Minis Faure ti ganny loner prezant avek Marguerite Leon.

Bann lezot gannyan ti resevwar zot pri avek bann diferan ozofisye Minister Ledikasyon.

LINKS