Komite responsab pour organiz Festival Kreol, ki demare Sanmdi 25 Oktob, in ranmas antou 241,000 roupi, larzan ki in gannyen atraver plizyer kontribisyon sorti kot bann donater (sponsors).

Dan en dernyen seri donasyon Vandredi 24 Oktob  apremidi sa komite ti kolekte 17,000 roupi sorti kot lakonpannyen Seychelles Breweries e plizyer lobze artizanal ideal pou fer kado ki ariv en lavaler 4,000 roupi, sorti kot Kreol 'Or.

Sete Minis pour Gouvernman Lokal, Spor e Kiltir Madanm Sylvette Pool, ki osi tyermenn Komite Festival Kreol, ki ti resevwar sa bann donasyon.

Tyek sorti kot Seychelles Breweries ti ganny prezante par direkter sa lakonpannyen Msye Andrew Richardson e pour Kreol 'Or, sa ti ganny fer par Madanm May Constant ki siperviz travay kot seksyon lartizana dan sa lakonpannyen.

Larzan ki Seychelles Breweries in ofer pou ganny servi pour organiz Sware Sega ki pou deroul tanto lo Stad Lanmizik.

Msye Richardson ti dir ki malgre serten difikilte ki son lakonpannyen ti pe pas ladan, i tre fyer pour asosye li avek Festival Kreol vi ki i en lokazyon spesyal ki anmenn bokou dimoun ansanm pour selebre en eleman enportan zot kiltir.

Festival Kreol, i ti fer remarke, i enn bann manifestasyon lokal ki'n enpresyonn li en kantite.

Madanm Susan Lonuys, ki responsab seksyon piblisite ek administrasyon kot Kreol 'Or, ti dir ki Festival Kreol i enn bann lokazyon kot zot profite pour partisipe avek lide ekspoz en pti pe plis bann lobze artizanal ki fer avek bann materyo de baz, parey legren rafya e kafoul koko ki ganny trouve lokalman.

Sa osi, i ti dir, i en fason pour promouvwar e ankouraz dimoun pour annan lanmour pour bann prodwi lokal, ki osi form parti nou kreolite.

Sa lide ti osi ganny partaze par Minis Pool ler i ti pe remersye sa de lakonpannyen pour bann kontribisyon ki zot ofer tou le lannen.

Minis Pool ti eksprim son swe ki zot a tou-l-tan reste bann zanmi fidel sa festival.

LINKS