Vis-Prezidan James Michel in dir ki gras a nou linite nou pep pe zouir en bon lavi e pei pe fer gran gran pa dan son devlopman.

"Nou kontan ki nou linite pe permet nou donn nou pep en bon lavi. Nou pa pou reisi nanryen kan sakenn de nou pe bos dan diferan direksyon," Vis-Prezidan Michel ti dir dan konklizyon diskour Bidze 2003 ki i ti prezante avek Lasanble Nasyonal Mardi le 24 Desanm.

VP Michel ti remet lanfaz lo nesesite asiz ansanm e fer travay pli serye pour konmans tir rannman dan bann lenvestisman ki pei in fer.

"Sa bann lenvestisman ki nou’n fer ... i apartenir a pep Seselwa. Fodre nou pa obliye ki ler nou konmans rekolte fri nou lenvestisman tou dimoun i devret benefisye," VP Michel ti dir.      

"Annou aret get deryer e gat letan pour rode si ti neseser envestir dan ankor en progranm lakaz, en nouvo stasyon elektrisite oubyen dan Seychelles Pride. Apretou, enn bann lakle nou politik se travay pour lazistis sosyal e en pli bon partaz nou larises," i ti azoute.

Letan i ti pe koz lo nesesite pour tou akter dan sosyete partisip dan sa nouvo plan ekonomik 5an pour Seychelles ki in mansyonnen dan son bidze (vwar nou lartik prensipal an Angle), VP Michel ti dir: 

"Si nou tou nou met latet ansanm e tonm dakor, sirman sa a donn nou plis lafors pour anmenn plis dibyen pour nou pei. Partisipasyon par tou dimoun a permet nou rekonsilye bann diferan lentere. Nou a kapab vin pli bon partner. Partisipasyon i osi konsern sa zenn fanmiy ki pe travay dir e pe met enpe larzan dekote pour envestir dan en bon lakaz. Pour mwan partisipasyon i vedir mobilizasyon, ranforsi nou kapasite, e anmenn ansanm sa bann bon lide e resours ki nou pep i annan."

VP Michel ti osi profit lokazyon pour felisit bon lorganizasyon e deroulman eleksyon parlmanter ki i ti dir i konfirm nou repitasyon konman en nasyon kot i annan lape ek lademokrasi.

"Fason egzanpler ki nou ti kondwir nou lekor pandan kanpanny eleksyon i montre ki pep Seselwa i oule met zot diferans dekote e zwenn ansanm pour rod le meyer pour nou zoli pti Seychelles," i ti dir.

I ti annan mo felisitasyon osi pour bann lider politik e bann manm lasanble ki i ti dir in deza demontre sa bon kolaborasyon ki a enspir nou pep ver plis progre. 

VP Michel ti osi reiter son konfyans dan lazenes Seselwa, ki i ti dir i "lakle lavenir nou pei".

"Rankont ki mon ti fer avek lazenes sa lannen i’n ranforsi mon konfyans dan lavenir. Nou zenes i atas gran lenportans avek nou bann prensip sakre lo lazistis sosyal, fraternite e caring. Zot ti devan e ti pe kriye 'Les Tonbe' ler nou pei ti organiz kanpanny kont bann fleo sosyal ki pe afekte nou sosyete. SPPF, konman en parti e gouvernman, pou kontinyen enkli nou lazenes dan tou sa ki nou pe fer. Mwan mon enn sa bann dimoun ki konnen tre byen ki nou zenes i annan bann bon lide pour kontribye.  Nou pou toultan reste alekout sa ki zot annan pour dir," Vis-Prezidan Michel ti dir.

"Nou bezwen kontinyen met bann striktir an plas, e ofer zot (lazenes) loportinite pour zot devlope. Nou pe ofer zot bokou, akoz nou annan konviksyon ki ler nou prepar nou zenes byen, anretour zot a fer en pli bon travay ki nou pour anmenn en Seychelles kot i gou viv," i ti azoute.

LINKS