Laserenad i desann anvil

Plis ki 200 zenn e bann trwazyenm az sorti partou lo Mahe, Praslin e La Digue, ti selebre atraver en laserenad byen kolore e ritme, lanmour e lafyerte pour nou kiltir e tradisyon.

Laserenad ki en levennman annyel pour demar Festival Kreol, ti konmans kot College of the Arts Mont Fleuri, desann lari Francis Rachel anpasan kot lorloz e defil lo Independence Avenue e Fifth June Avenue, pou al termin lo Stad Popiler.

Sa laserenad ti reflekte fason viv, anmize, zwe, panse e abiyman nou bann zanset me ki zot valer i ankor vivan parmi nou bann zenn zenerasyon. I ti ganny akeyi tou dilon semen par bann spektater ki ti’n desann an gran nonm pou vin aklam sa manifestasyon, ki ti osi ranpli avek bann plezantri ki ti fer bokou riye, sourir e reviv bann moman gou lepase.

Plizyer zenn koman vye ti’n met zot kazak ek penwanr e zot sapo lapay pou demontre zot lafyerte Kreol, tandis ki lanmod met fler dan latet ti retourn ankor. Bann peser zot, zot ti profit sa moman pou al lev kazye.  Kot larivyer bann bake ti’n ranpli ek lenz, tandi ki kot lakour i annan ki ti pe triy diri oubyen bred dan lavann. Deor dan lari balye koko e balye zig ti pe rakont zot prop zistwar e marmay ti pe zwe boul, ronn e fer roule zot larou ranpli ek savon ladan. Pour lezot zot ti prefere zwe zot loto an dibwa.

En personnaz misterye dan en gran rob nwar ek gran seve blan e nennen pwent, ki ti ganny rekonnet koman en bonnonm dibwa oubye sorsye, ti pe misouk misouk pandan ki per ti pe donn son benediksyon.

Pour bann zenn fiy ki ti pe konmans dekouver lanmod modern, sa ti lokazyon pou zot met zot tou deor e desann anvil. Ou ti a vwar zot kot zot ti pe devis zot leren e pe fer zot granzar. Bann ki ti pli aze, ti prefere zwenn ansanm e dans kanmtole. 

Bann klib lanvironnman ti osi profit sa lokazyon pou partaz zot pwen-n-vi lo proteksyon labote nou zil e bann lespes parey torti ki ti en delikates dan lepase me  ki pe ganny prezerve ozordi. Mesaz ki zot ti pe fer pase se ki nou kiltir e tradisyon Kreol pa pou kapab kontinyen epanouir san en lanvironnman senn.

LINKS