Sesyon louvertir Kolok Lendi kot Lenstiti Kreol

I neseser ki tou kominote kreol i dinamik dan zefor pour promouvwar lalang ek kiltir kreol, Minis pour Zafer Sosyal ek Lanplwa, Msye Dolor Ernesta, in dir.

I ti dir ki sa i neseser akoz si nou les li ganny anvair negativman par globalizasyon lemonn ki pe ariv tre vit, nou kapab perdi nou lidantite, e san en lidantite, nou pa en nasyon.

Minis Ernesta ti pe koz pandan louvertir Kolok Enternasyonal – enn bann aktivite mazer Festival Kreol – ki ti fer Lendi 27 Oktob kot Lenstiti Kreol, Au Cap, dan prezans Minis pour Gouvernman Lokal, Sport ek Kiltir, Madanm Sylvette Pool, lezot minis, kreolis sorti dan kominote kreol e osi bann akademisyen enternasyonal ki fer resers dan domenn Kreol.

Sa seromoni ti osi ganny onore par prezans bann minis ek responsab kiltir dan rezyon Losean Endyen.

Pandan son diskour, Minis Ernesta ti dir ki gouvernman in pran en gran pa an deklaran Kreol koman nou lalang maternel ensi ki en lalang nasyonal.

I ti dir ki menm si pour rezon istorik sa p'ankor posib dan tou kominote kreol, in tou-d-menm donn son sipor bann dimoun dan tou kominote kreol ki pe travay pour devlopman sa lalang.

Pour bann ki spesyaliz oubyen ki travay dan devlopman Kreol isi Seychelles, Minis Ernesta ti donn son lasirans ki sa langazman ki gouvernman in fer avek lepep dan son konstitisyon, kot langaz i konsernen, i ankor ferm.

"Se zot ki bezwen serse e vin avek nouvo propozisyon pour en kontinyite dan devlopman Kreol koman nou lalang nasyonal, nou lalang maternel e donk, nou lalang pour en pli gran devlopman lepep," Minis ti azoute.

Minis Ernesta ti fer remarke ki dan ka Seychelles, Kreol ki ti en lalang soubaltern in aprezan vin nou lalang nasyonal e nou lafyerte, e i ti lans lapel pour ki tou bann frer kreolis prezan i zwenn ansanm avek bann Seselwa pour donn Kreol plis lafors, atraver en linite mondyal kot tou kominote kreol i atrap lanmen e kree lasenn lanmitye ek korperasyon, ki a asir lavenir bann zanfan demen.

Minis ti eksplike ki dan tou sa ki nou fer – nou panse, nou koze, nou danse, nou manze, nou kontan e nou sagren – nou bezwen en langaz pour eksprimen; e sa pa kapab ganny fer dan okenn lalang apard ki nou lalang maternel, lalang ki i ti dir nou kiltir i fonde ladan.

Akoz fenomenn globalizasyon bann pei i bezwen aprann lezot langaz ki dominan dan lemonn, me sa Minis Ernesta ti dir pa devret anpes bann kominote kreol asir kontinyasyon devlopman nou lalang maternel.

Ti osi annan swe labyenveni pour tou bann frer ek ser ki sorti lot kote lemonn e osi dan rezyon Losean Endyen ki'n vin partisip dan Kolok 2003 ki pe deroul anba tenm "Kreol: En lalang dinamik dan lemonn".

Pandan trwa zour bann partisipan i ekspekte egzamin rol ki Kreol koman en group lalang i zwe dan lemonn ozordi, par rapor avek bann kominote kot Kreol i en lalang vivan, parmi lezot pwen.

LINKS