Bann manm Lasanble Nasyonal in lans en lapel avek tou sitwayen Seychelles pour met zefor e travay ansanm pour ki pei a kapab sirmont bann difikilte ki i pe pas ladan.

Sa bann manm ti pe koz pandan sesyon deba Zedi26 Fevriye lo diskour Leta Lanasyon ki Prezidan Larepiblik, Msye France Albert Rene, ti fer Mardi 24 Fevriye dan Lasanble Nasyonal.

Zot ti pran laparol apre ki Lider Lopozisyon, Onorab Wavel Ramkalawan, e Lider Biznes Gouvernman dan Lasanble, Onorab Patrick Herminie, ti'n donn zot reaksyon pli boner.

Deba ti kontinyen pandan lazournen Zedi avek prezantasyon fer par manm Onorab Andre Pool, Shelton Jolicoeur, Dick Esparon, Rukaiya Jumaye, David Pierre, Ivy Edmond, Hardy Lucas, Anne-Marie Mathiot, Robert Georges e Gerald Julie.

Laplipar bann manm parti mazoriter ki ti koze ti dir ki fodre ki pep Seselwa i rekonnet zefor, sakrifis e travay dir ki Prezidan Rene in fer pour diriz e devlop Seychelles e fer li konn progre. 

Onorab Pool ti fer resorti ki latas difisil ki Msye Rene ti anbark ladan pour transform sa pei in anmenn loportinite pour lazenes, lenvestisman dan lekonomi e progre remarkab dan sistenm ledikasyon, lasante, servis transpor piblik e lezot ankor.

I ti dir ki pei pe pas dan en letap difisil e fodre ki tou dimoun i travay ansanm dan lape, linite e respe pour ki nou ava sirmont bann defi e fer ki sitiasyon i ava amelyor pli vit.

Onorab Pool ti dir ki  Gouvernman ek Lopozisyon i kapab egziste kot-a-kot me ki fodre met en fren avek politik konfrontasyon pour ki ava annan progre.

Onorab Esparon ti lo son kote demande ki tou Seselwa i aprann apresye bann keksoz ki pozitiv, ki zot aret war zis dimal dan tou sa ki ganny fer e ki zot zwe zot rol pour devlop Seychelles, akoz zot tou, i ti dir, i kapab ede fer en diferans.  

Bann manm parti mazoriter ti dekri sa diskour koman enn ki ti tre istorik e emosyonnel. Zot ti asir tou zot sipor pour Vis-Prezidan James Michel ki'n ganny swazir pour ranplas Prezidan Rene ler i sorti o pouvwar pli tar sa lannen.

Onorab Jolicoeur ti eksplike ki plizyer lartik dan Konstitisyon pei i donn Prezidan sa lotorite pour pas pouvwar avek en kandida ki ganny swazir pour ranplas li dan sirkonstans kot i sorti o pouvwar. Sa kandida, i ti dir, i asir kontinyite son manda ziska ler nouvo eleksyon i ganny fer.

Lezot manm SPPF ti osi retras kote Seychelles ti ete 40 an pase e kote in arive ozordi ki zot ti dir i gras a vizyon Prezidan Rene.

Lo zot kote bann manm dan Lopozisyon, enkli Onorab Pierre, Lucas e Julie, ti dir ki Prezidan dan son diskour pa'n donn Seselwa vre realite leta nou nasyon, ki zot ti dir in plonz dan en kriz ekonomik ki pe kre bokou soufrans e fristrasyon parmi lepep.

Malgre bann mezir ki'n ganny pran, zot ti dir, sitiasyon pa pe amelyore e gouvernman in perdi son priyorite kot par egzanp dan plas servi deviz etranzer pour fer vini bann keksoz esansyel i pe enport labyer ek transpor.

Dapre zot, nanryen pa pe ganny fer pour retir sa ki zot in dekrir koman koripsyon e gaspiyaz dan gouvernman. Zot ti dir ki sistenm liberal Seychelles National Party i sel solisyon pour Seychelles.

Onorab Julie ti osi akiz gouvernman SPPF pour detri moralite nasyon Seselwa atraver sa sistenm sosyalis rizid anba parti inik kot ser e frer ti vir kont kanmarad e kot larelizyon ti ganny oprese. I ti dir ki si ozordi bann valer moral in perdi se akoz sa zenerasyon sa lepok pa'n ganny sa bon gidans spirityel.

LINKS