Loperasyon kont vol ek vyolans

Lapolis i raport progre

Prezidan i dir stratezi pou kontinyen

Lapolis in raport en progre enportan dan zot bann premye zour loperasyon konzwent avek lafors defans kont sa dernyen vag vol ek violans dan pei.

E Prezidan James Michel in profit sa lokazyon pour felisit sa loperasyon e in azoute ki zot pa pou aret la pour asire ki pei i reste dan lape ek trankilite.

Komisyoner Lapolis Andre Quilindo in dir apre son retour dan pei ki parmi en 75 warant ki ti'n fer sorti dan lepase pour aret sispe plizyer lofans, en bon trantenn in ganny ranmase pandan sa bann dernyen zour.

Plizyer parmi bann dimoun ki ti enplike dan bann ka vol tou dernyenman in osi ganny arete e Lapolis in komans retrouv serten lobze ki ti'n ganny vole.

Msye Quilindo in osi anonse ki zot in met lanmen lo enn de dimoun ki anba sispe trafik drog.

Komisyoner in plas en gran valer dan sa Hotline 323333 ki Lapolis ti met a dispozisyon piblik pour ganny en pe plis korperasyon.

“Mon oule remersye tou bann dimoun ki'n servi sa limero seryezman pour ed nou dan nou travay e fot espere ki nou a kontinyen ganny zot led ek zot soutyen,” Komisyoner in dir.

LINKS