Prezidan France Albert Rene in demann tou bann manm Lasanble ozordi e dan lavenir pour prezerv sa lideal nob e garanti lenportans sa lenstitisyon afen ki vre lademokrasi i kontinyen rennyen Seychelles.

Sa i vin dan en mesaz ki Prezidan Rene in anvoye alokazyon 10enm lanniverser Lasanble Nasyonal 3enm Repiblik Seychelles.

Sete Vis-Prezidan James Michel ki ti lir sa mesaz avek manm Lasanble pandan zot sesyon travay mardi le 29 zilyet.

Mesaz Prezidan i lir konm swivan:

"Parmi bann konponan kle dan lademokrasi Seychelles se sa mekanism ki permet popilasyon Seselwa partisip aktivman dan deroulman ek devlopman pei a traver en Lasanble Nasyonal.

"Pour ki sa i kontinyen evolye i tre enportan pour reprezantan lepep reste an kontakt avek son bann dimoun dan bann distrik afen ki Lasanble i kapab touzour reste sa foronm kot bezwen lepep ek son pwennvi ensi ki lentere nou nasyon i ganny byen reprezante.

"Lasanble Nasyonal i en foronm nob kot reprezantan lepep i konplemant travay legzekitif afen ki nou pei i touzour reste lo en semen bon gouvernans pour benefis lepep Seselwa.

"Reprezantasyon en pep dan en tel foronm deba, diskisyon ek lenformasyon i konstitye enn bann lavenn pli enportan dan en demokrasi. Donk i enportan ki malgre ki Lasanble Nasyonal i en lasenn deba, nou pa tourn son bann prosedir dan en performans teatral.

"I tre enportan alor ki sa ki deroule lo lasenn Lasanble i en prosesis par lakel nou pei i ariv lo bon desizyon dan benefis lepep, avek lentere lepep aker, afen ki gouvernman i byen kapab fer son progranm marse e lopozisyon i ganny sans fer en kontribisyon zis e valab san ki sa foronm i dezenere pour vin en landrwa kot politik i vin en zwe ek en mannev.

"Dan bokou fason, Lasanble Nasyonal in vin en mirwar levolisyon ek devlopman Seychelles ek nasyon Seselwa e se en vre refleksyon sa devlopman ki nou Lsanble ozordi i enkli dimoun ki sorti dan tou kwen Seychelles e ki anmenn lo latab en diversite leksperyans ek santiman.

"Deplizanpli Lasanble i reflekte en diversite ek en nivo deba ki reflekte lafason ki lademokrasi in evolye Seychelles, en lademokrasi ki'n touzour vize pour anmenn plis progre ek lepanouisman lepep Seselwa.

"En karyer politik i fondamantalman en lavolonte lo lapar sa politisyen pour fer en diferans pour son pep e dan bokou sans Lasanble i sa veikil pour sa reprezantan fer son kontribisyon konte.

"Mon pran sa lokazyon istorik pour demann tou bann manm Lasanble ozordi e dan lavenir pour prezerv sa lideal nob e garanti lenportans sa lenstitisyon afen ki vre lademokrasi i kontinyen rennyen Seychelles e ki nou vreman travay pour byennet nasyon Seselwa.

"Mon zwenn avek zot tou pour selebre sa gran zour dan listwar nou Lasanble Nasyonal e mon swet zot bon kouraz dan zot travay."

LINKS