Rezyon Was in sa lannen domin konpetisyon ladans kanmtole ki ti deroul dan Sant Konferans Enternasyonal Zedi le 30 Oktob.

Konpetisyon kanmtole, ki en aktivite anyel lo kalandriye Festival Kreol, ti vwar partisipasyon plizyer etidyan lekol primer ek segonder e osi bann adilt.

Sa lannen bann konpetiter ti partisip dan trwa kategori – primer, segonder e 18 a 45 an e konpetisyon ti lo nivo rezyon.

Rezyon Was ti rakle pri pour meyer lekol primer tandis ki dezyenm pri ti ranporte par rezyon Sid. Bann partisipan rezyon Santral ti bezwen satisfer zot avek trwazyenm plas.

Sa senk finalis dan sa kategori ti bezwen dans 4 morso ladans ki ti enkli vals, kotis senp, avan-kat e men-gos men-drwat.

Se Madanm Raymonde Onezime, direkter divizyon Kiltir dan Minister Gouvernman Lokal, Spor ek Kiltir ki ti prezant bann pri dan sa kategori.

Dan dezyenm kategori (lekol segonder) se ankor enn fwa rezyon Was ki ti gran venker, swivi dan dezyenm pozisyon par bann zil pros. Trwazyenm plas ti al pour rezyon Nor.

Sete Minis pour Lanvironnman, Msye Ronny Jumeau, ki ti prezant bann partisipan avek zot pri. Dan sa enn kategori bann danser ek dansez ti bezwen dans kotis doub, kotis an-glisan, galo ek avan-trwa.

Dan dernyen kategori (18 a 45 an) kot bann konpetiter ti bezwen dans mazok, dyaz, men-gos men-drwat e kontredans final, rezyon Sid ti sorti gran venker. Rezyon Was ek Sid ti ranport dezyenm ek trwazyenm pri respektivman.

Sete benn Zez ki ti zwe bann diferan morso ladans kanmtole.

Bann konpetiter sa kategori ti resevwar zot pri avek Msye Michel Savy, asistan direkter Festival Kreol.

Minis Lar ek Kiltir Morisyen, Msye Motee Ramdass, ti ganny loner prezant bann partisipan ki ti pran par dan demonstrasyon bann diferan ladans kanmtole avek en pri sakenn.

Pandan sa sware group Malesh sorti Comores ek group Alegria sorti Goa, Inde, ti osi fer diferan performans, ki lodyans ti byen aklamen.

LINKS