Kretyen i desann an mas pour selebre Lapannkot

Malgre move tan en gran lafoul ti asiste lanmes dan Stad Lanmizik a lokazyon lafet Lapannkot

Malgre move tan en gran lafoul kretyen ti ralye lo Stad Lanmizik Dimans le 30 Me,  pour partisip dan sa gran rasanbleman bann dyosezen pour ini bann katolik a lokazyon lafet Lapannkot.

I fer premye fwa ki Lapannkot – ki vedir '50 zour' e ki zisteman ganny selebre 50 zour apre Pak pour komemor lalyans ant Bondye avek pep Izrael – i ganny selebre par en tel manifestasyon isi Seychelles.

Sa rasanbleman solanel ti demar avek animasyon spirityel, en seri sanson relizye fer par bann group lakoral sorti dan diferan parwas.

Latroup Teat Nasyonal ti osi prezant en pyes lo levennman Lapannkot.

Sa ti swiv par lanmes, selebre par levek legliz katolik Denis Wiehe, asiste par tou bann pret ek dyak katolik ensi ki levek legliz anglikan French Chang Him ki ti prezan koman en envite spesyal.

Dan son lapres levek Wiehe ti retras listwar lafet Lapannkot koman nesans e laniverser legliz me anmenmtan koman sa lafet kot nou pran konsyans sa lafors ekstraordiner ki Bondye in donn nou parey i ti donn son bann zapot lo premye zour Lapannkot kot lespri sen ti desann avek en gro divan e dife.

Levek ti osi demann bann kretyen prezan pour sa kenn de zot, dan zot leker, priye e demann lespri sen pour vin dan zot lavi, pirifye zot, geri zot e fer ki zot a viv en lavi meyer dan zot fanmiy, dan travay e dan lasosyete.

Levek Chang Him ti osi adres lafoul e i ti demann bann prezan pour reflesir lo bann diferan lenstan kot le Sent Espri in travay e fer ki i a travay parey dan zot lavi.

Pandan ki bann animasyon mizikal ti pe pran plas, diferan parwas e mouvman legliz ti osi fer prezantasyon zot lanblenm atraver bann bannyer ki ti apre ganny afise dan Stad Lanmizik.

Sa lanmes o-plenn-er, ki ti osi en servis lakominyon, ti arete ver midi edmi kot bann dimoun ti kapab al dezennen. Plizyer stall manze ek rafresisman ti'n ouver dan stad pour bann ki pa ti oule deplase pour al lwen.

Rasanbleman ti repran 1.30 avek ankor animasyon mizikal, ziska 3er 30 kot levek Wiehe ti fer en benediksyon final pour tou sa ki ti'n rasanble e pour Seychelles an antye.

LINKS