One of the newly completed housing estates on Mahe

Deba lo prensip zeneral e merit Bidze 2004 ti komanse dan Lasanble Nasyonal Zedi le 4 Desanm,  e le de diskour prensipal ti fer par Lider Lopozisyon Wavel Ramkalawan e Lider Biznes Gouvernman dan Lasanble Patrick Herminie.

Parey in touzour leka, pwen-d-vi sa de kote ti diferan lo merit Bidze 2004.

Pour Msye Ramkalawan, ki osi Lider Seychelles National Party (SNP), apre diskour bidze ki Vis-Prezidan James Michel ti fer Mardi pase, dimoun pe dir mersi me anmenmtan partou kot ou pase ou rankontre dimoun ki pe apros sa nouvo lannen koman bann pesimis e pe eksprim lafreyer akoz zot pe viv dan lensertitid e zot nepli kapab planifye zot lavi e zot biznes.

Msye Ramkalawan ti dir ki tou keksoz i dan boulvers e bidze pa'n fer nanryen pour sanz sa persepsyon.

An repons, Msye Herminie, ki ti pe koz pour gouvernman e parti Fron Progresis Pep Seychelles (SPPF), ti dir ki fodre pa bat latet dimoun akoz atraver bidze i byen kler ki gouvernman pe fer en zefor serye e determinen pour rezourd problenm ekonomik ki pei i ladan.

I ti dir ki i kler ki bidze pe dir dimoun pa depans plis ki zot gannyen e fer e pe sakrifis pour ki zot kapab kontinyen benefisye pli tar avek sa standar lavi o ki zot deza annan.

Msye Herminie ti dir ki bidze in fer dan konteks nouvo plan makro-ekonomik e pep Seselwa i konpran sa tre byen, e zot konnen ki sa plan in ganny met anplas pour redres lekonomi apre depans ki gouvernman in fer lo zot menm pour donn zot sa standar lavi aktyel.

Pli enportan ki bann sif dan bidze, Msye Herminie ti dir, se prensip e valer ki i pe promouvwar e reafirm krwayans dan lazistis sosyal, legalite loportinite, ledikasyon, lasante, sekirite pour vyeyar, e sa se bann keksoz ki SPPF i kwar ladan.

Dan son diskour, ki ti al plis ki trant minit, Msye Ramkalawan ti esey eksplike ki mannyer dapre li keksoz i dan boulvers.

I ti dir ki ti'n fodre donn plis larzan minister parey lasante e ledikasyon ek lafors lapolis,  ofer lendistri tourism en nouvo "package" akoz dapre li lager golf e lepidemi Sars in zwe zis en pti rol pour anpes touris vin Seychelles. Dapre li se pri bann prodwi ek servis ki pe afekte lendistri touris, sirtou apre lentrodiksyon GST.

Msye Ramkalawan ti osi koz lo lendistri lapes kot i ti dir ki menm si gouvernman i fyer "avek sa ki nou'n gannyen, fodre pa ki nou asiz lo la."

Touzour selon Msye Ramkalawan ti devret annan plis lankourazman dan sekter fabrikasyon ek pti biznes.

I ti dir ki fodre ki pep Seselwa i annan plis respe pour lasanble. I ti demande ki en deba nasyonal lo rol e devwar en MNA i ganny organize an 2004.

Msye Ramkalawan ti dir ki i dakor avek progranm restriktirasyon det akoz son parti i osi kwar ladan me fodre pa ki i annan plis det.

I ti dir ki i osi dakor avek Minis Finans pour rode kot i annan gaspiyaz, me fodre gete osi kote i merit plis sipor e donnen.

I ti dir ki i osi dakor avek privatizasyon me pa avek prosedir ki mannyer gouvernman ki o pouvwar i swiv.

Msye Ramkalawan ti dir ki "2004 pou vin pli difisil pour travayer koman biznesmenn, vre lefe GST pou ganny resanti, pouvwar aste pou tonbe, plis bil delo elektrisite ek telefonn pa pou ganny peye e komodite esansyel dan laboutik pou vin pli rar."

Lo son kote Msye Herminie ti dir ki napa nanryen dan en pei ki en drwa. Dimoun dan en pei i bezwen travay dir pour ganny sa ki i bezwen, tou sa ki i konsonmen e menm apre ki in rente i bezwen fer sir ki i annan en sistenm anplas pour asire ki bann prodwi i ganny distribye dan en fason normal e ekitab pour ki tou dimoun i benefisye.

I ti dir ki se sa ki fer en lekonomi for e solid dan en sistenm kot i annan legalite e lazistis sosyal.

I ti dir ki tro souvan "nou ekspekte tro bokou sorti kot gouvernman san vreman apresye nou rol dan devlopman nou pei."

Manm Lasanble Nasyonal pour Anse Boileau Andre Pool ti lot dimoun ki ti pran laparol apre Msye Herminie.

Li osi i ti fer resorti ki sa bidze i premye ki ganny fer anba sa plan makro-ekonomik ki pei i bezwen fer pour "atak nou problenm pour ki nou kapab kontinyen fer pli byen ankor."

I ti dir ki menm si o komansman dimoun i dan en serten difikilte avek GST e "trades tax" keksoz pour amelyore evantyelman letan "trades tax" i ganny tire gradyelman.

LINKS