Servis Meteolozi in dir ki lakantite lapli ki'n tonbe pandan wikenn, sirtou pandan lazournen Sanmdi i normal pour sa mwan Zanvye vi ki Sesel i dan sezon lapli.

Dapre direkter Servis Meteolozi, Msye Wills Agricole lakantite lapli ki'n tonbe i an rezilta nou zòn lapli ki'n kouver nou rezyon konpletman ensi ki lefe sezon siklonn ki pe ganny eksperyanse dan Losean Endyen.

I ti dir ki mwan Zanvye in sa mwan pandan nou sezon lapli, ki'n toultan resevwar maksimonm lapli. Apepre 120 milimet lapli ti ganny rikorde dan lespas trwa-er-t-an lo bomaten Sanmdi, e sa ti okazyonn plizyer dega dan Les e Sid Mahe. 

Servis Meteolozi ti boner Sanmdi, averti ki pou annan gro lapli pandan lazournen e depi lo bomaten menm, plizyer lazans tel parey Brigad Tenny Dife, Divisyon Transpor lo Later e bann manm brigad dirzans dan plizyer distrik ti'n fini mobilize pou fer fas avek bann lensidan ki ti kapab arive.

Gro lapli ki'n tonbe pandan lazournen Sanmdi in koz bokou dega, enkli linondasyon e deboulir lateras.  Delo ti monte lo semen, inond plizyer lakaz e laboutik, e lateras ti degrennen e kouver serten parti semen, ki ti bezwen reste fermen tanporerman. Bann distrik ki ti pli ganny afekte ti Pointe Larue, Anse Aux Pins, Au Cap, Anse Royale e Anse Boileau.

Linondasyon dan plizyer landrwa ti an rezilta bann larivyer e sours delo ki ti'n deborde e agrave par lanmer mont, ki ti ede pou restrikte sirkilasyon delo. Ver Sanmdi apremidi delo ki ti'n monte ti'n komans desann enpe, apre ki lanmer ti pe sek.

Dapre rapor, Anse Boileau, dan zanmerant Southern Supply, delo ti mont apepre en met oter e ti fors plizyer dimoun pou evakye zot lakour, tandis ki serten parti semen lo pon Anse Aux Pins pre kot Kord Gard, ti sibir domaz koze par lentansite delo ki ti'n debord lo pon, e ti bezwen fermen tanporerman. Lateras ki ti'n degrennen Montagne Posée, ti met ater en poto elektrik ki ti koz koupir kouran pour enpe letan dan Les Mahe.

An rezilta movetan e vizibilite ki ti tre ba, Air Seychelles ti osi eksperyans serten retar dan son bann vol domestik sorti Mahe pou al Praslin, pandan lazournen Sanmdi.

Menm si lapli ti osi tonbe lo Praslin e La Digue, okenn lensidan dezas pan'n ganny raporte lo sa de zil, e Nor Mae osi pan'n sibir okenn dega.

"Lakantite e lentansite sa lapli ki'n tonbe i normal akoz atmosferikman en kondisyon ideal in ganny kree e nou zòn lapli in form lo nou e son lefe sete bann lapli varyab e for, parfwa avek zekler e loraz, me san gro divan," Msye Agricole ti eksplike.

Servis Meteolozi in anons en amelyorasyon dan letan pour sa prosen detrwa zour me in averti ki avek re-organizasyon dan nou zòn lapli, nou ekspekte eksperyans menm kondisyon letan ver lafen sa semenn, me posibleman avek mwens dega.

LINKS