Parey tou le lannen Caritas Seychelles i selebre zot lazournen tou le dezyenm Dimans pandan karenm.

Lazournen sa lannen pou ganny selebre demen anba tenm "Sa ki resevwar en zanfan akoz mwan i resevwar mwan" (sorti dan labib: Matthieu 18 verse 5).

Sa tenm in ganny swazir pour koensid avek mesaz lepap pour sa karenm 2004, kot i pe demann bann kretyen pour tret tou zanfan bondye parey avek lanmour e lape.

Plizyer aktivite in ganny prevwar pour sa lazournen e dapre vis-prezidan Caritas Seychelles, Madanm Rita Savy, aktivite prensipal pou deroul dimans le 7 mars avek lanmes dan bann parwas kot Caritas i aktiv.

Madanm Savy ti azoute ki pour sa zour spesyal lanmes pou ganny animen par bann manm Caritas tel ki dan prosesyon ofrann e lektir pandan selebrasyon lekaristi.

"Pour sa zour bann lafis ek paviyon Caritas pou osi an-vant, avan e apre lanmes, koman en fason pour ranmas en pe fon," Madanm Savy ti dir.

Apard aktivite spirityel, bann manm Caritas pou sa menm zour osi profite pour vizit bann diferan lenstitisyon tel ki Sant Reabilitasyon North East Point, Lenstiti Fiennes Plaisance e kot bann dimoun avek dezabilite, pour egey bann pasyan ek rezidan dan sa bann landrwa e donn zot sipor.

Bann lanvlop Caritas pou osi disponib kot legliz ek biro Caritas pour bann dimoun ki ti a kontan fer okenn kontribisyon finansyel.

Caritas Seychelles i enn parmi bann striktir relizye ki ofer led dirzans e tanporer bann dimoun ki rankontre problenm tel ki perdi zot lakaz ouswa pa kapab soutenir zot fanmir finansyerman.

"Nou aksepte bokou donasyon tel ki lenz, matla e menm bann prodwi manze ki ed nou pli byen kapab ofer en servis bann ki dan bezwen," Madanm Savy ti azoute.

Dan le pase Caritas in menm etabli diferan latelye aprantisaz koud pour bann zenn fiy ki'n kit lekol tre zenn, koman en mwayen pour zot ed zot lekor.

Plizyer sa bann prodwi lakoutir pou an-vant dan bann parwas pandan "Bring and Buy" organize par diferan distrik.

Caritas Seychelles pe profite pour lans en lapel spesyal pour bann dimoun ki ti a kontan ofer led volonter ou finansyer pour vin devan e ed bann ki mwen fortinen koman zot sakrifis karenm.

LINKS