Enn bann delege i felisit Prezidan Michel

Prezidan Michel pe adres bann delege pandan rankont Merkredi apremidi

Prezidan James Alix Michel in donn son langazman pour kontinyen travay pour mentenir lazistis sosyal ek legalite loportinite - de prensip sakre parti Fron Progresis Pep Seychelles (SPPF).

Prezidan Michel, ki osi sekreter zeneral sa parti, ti pe koz dan en rankont Merkredi apremidi (5 Me), kot Maison Du Peuple avek plis ki 400 siporter SPPF ki ti'n vin pas zot bann meyer ve ek mesaz solidarite anver li an tan ki nouvo Prezidan Seychelles.

Prezan kot sa rasanbleman anba tenm "Rankont Solidarite" ti bann manm komite santral SPPF, manm komite brans SPPF sorti dan tou distrik lo Mahe, manm Lazenes SPPF e osi manm Lig bann Madanm SPPF.

Dan zot mesaz bann delege ti felisit Prezidan Michel e salye son kouraz pour aksepte sa latas difisil pour diriz pei ver plis devlopman ek prosperite. Bann militan SPPF ti asir Prezidan Michel ki zot pou donn li tou zot sipor e zot ti felisit li pour sa bon kalite gouvernans ki in komanse.

"Depi ki in pran labar sa zonm parol in anmenn en nouvo souf dan Seychelles," zot ti dir.

Ti osi annan mesaz remersiman pour ansyen Prezidan France Albert Rene pour travay ki in fer pandan son letan ki i ti opouvwar e osi swe ki i pas en bon retret.

Apre ki i ti'n ekout tou sa bann mesaz, Prezidan Michel ti remersye bann siporter SPPF pour sipor ek konfyans ki zot in met dan li.

Prezidan Michel ti fer remarke ki depi prezidans in pas avek li, in annan en nouvo souf dan pei e ki sa nouvo lapros konsiltasyon ek dyalog ki in komanse pe anmenn pei dan en nouvo faz devlopman ki pou benefisye tou Seselwa.

I ti dir ki tou militan parti i devret anmenn sa mesaz dan bann distrik avek bi enkilke dan tou dimoun sa nouvo lespri pour kree plis linite ek larmoni.

Prezidan Michel ti osi reafirm son langazman pour travay pour byennet tou Seselwa e sa, i ti dir, pou kapab ganny fer si tou Seselwa i annan volonte pour travay ansanm dan lentere Seychelles.

Prezidan Michel ti osi koz lo bann defi ek loportinite ki parti SPPF i annan pour vin parti tou Seselwa. Loportinite, i ti dir, se pour donn parti en nouvo dimansyon avek bi fer li kontinyen reste zenn e vin pli solid ek kredib.

Prezidan Michel ti dir ki meyer fason pour remersye Prezidan Rene se par redouble zefor pour travay ansanm dan larmoni ek lape e fer Seychelles avanse.

Pandan sa rankont artis parey Michelle Marengo, Mervin Camille, Jean-Marc Volcy ek “Su Shine” ti osi sant bann sanson patriotik.

Apre sa bann prezan ti ganny sans felisit e koz avek Prezidan Michel dan en resepsyon an deor Sant Konferans Enternasyonal.

LINKS