Deba lo prensip zeneral e merit Bidze 2004 i sipoze terminen ozordi avek komanter Vis-Prezidan James Michel lo bann pwen ki bann manm Lasable in leve dan zot diskour.

Serten manm ki pa ti ganny sans koze Zedi e Vandredi i sipoze pran laparol ozordi bomaten avan ki Vis-Prezidan Michel, dan son kapasite koman Minis pour Finans, i fer son komanter.

Apre sa, Lasanble i ekspekte antre dan staz komite pour diskit bann alokasyon enn par enn.

Dan deba Vandredi, bann manm parti mazoriter ki ti pran laparol – notaman Onorab Barry Faure, Onorab Mitcy Larue, Onorab Waven William, Onorab Anne-Marie Mathiot, Onorab Walter Confait, Onorab Robert Georges, Onorab Ginette Gamatis e Onorab Ivy Edmond – ti dir ki zot siport sa bidze akoz i enn ki annan bokou merit  e ki pou ede redwir gaspiyaz ki alafen pou anmenn plis prosperite pour pei.

Kant a bann manm dan Lopozisyon ki ti fer zot lentervansyon – Onorab Hardy Lucas, Onorab Gerald Julie, Onorab Regina Alcindor, Onorab David Pierre e Onorab Bernard Georges – ti dekrir propozisyon Bidze 2004 koman enn ki vid e ki donn fo lespwar pep Seselwa.

Lefe ki lakantite larzan ki bann diferan minister i resevwar in redwir, Onorab Larue ti dir ki sa pa vedir ki sa bann minister pa pou kapab fonksyonnen. I ti dir ki sa i senpleman mezir disiplin fiskal ki'n ganny met an plas avek bi asire ki napa gaspiyaz.

Sa koupir dan bidze, i ti dir, ava asire ki bann administrater ava byen administre larzan piblik e vwar priorite ek bezwen e non pa kontinyen fer gaspiyaz.

Onorab Larue ti dir ki i konfidan ki sa nouvo progranm makro ekonomik pou ede fer pei al delavan.

Parey Onorab Larue, Onorab Faure ti dir ki Bidze 2004 i fer provizyon pour ki napa gaspiyaz dan bann diferan minister e sa ava ankouraz bann lotorite dan distrik pour rod lezot metod inovatif ki pa pou depan antyerman lo gouvernman pou fer marse bann diferan proze.

Onorab Pierre ti dir an prensip sa bidze i enn ki vid e pa anmenn bokou lespwar lefe ki in annan en rediksyon dan alokasyon larzan pour Minister Ledikasyon ek Lasante. I ti dir ki en rediksyon dan Minister Ledikasyon pou annan en lefe negativ lo kalite ledikasyon pour bann zanfan lefe ki sa pou agrav sitiasyon mank resours dan bann lekol e an rezilta sa pou retard progre bann zanfan. Rediksyon dan sa minister, i ti dir, pou kree plis defayans e ki i annan en bezwen pour envestir plis dan bann etidyan ek ansenyan kalifye.

Lo kote lasante, Onorab Pierre ti dir ki rediksyon dan sa minister pou annan en lenpakt negativ lo sistenm lasante akoz en pep ki pa an bonn sante pa pou kapab prodwir.

I ti osi dir ki sa bidze pa eksplik an detay bann stratezi ek fason ki gouvernman pou deal avek problenm deviz etranzer e ki i annan en nesesite pou revwar rol gouvernman ek sekter prive.

Onorab Julie ti osi fer referans lo rediksyon dan Minister Lasante ek Ledikasyon, kot i ti partaz menm lenkyetid avek Onorab Pierre.

I ti dir ki rediksyon dan sa de minister pou annan lefe negativ lo sa de sistenm primordyal en pei.

Bann manm Lasanble sorti dan parti mazoriter ti dir ki sa bann keksoz ki lopozisyon pe dir pa pou arive si bann minister i travay dan en fason serye e kalkil byen zot priorite.

Zot ti dir ki komanter bann manm lopozisyon se zis pou esey fer dimoun per.

LINKS