Plis ki 40,000 dimoun in fini ganny zot nouvo kart idantite depi ler ki i ti ganny entrodwir an Zanvye lannen pase.

Sa nouvo kart, ki valid pour en peryod 10 an, i an plastik e pe ranplas sa enn an metal. I osi an kouler e annan en bar code ki enkli nimero idantite nasyonal sak endividi.

Dapre zofisye ansarz kot Biro Kart Idantite dan batiman Oceangate House, Msye Harrison Lucas, zot in reisi distribye 42,475 nouvo kart ziska prezan e sa i reprezant apepre 95% bann dimoun ki zot kart ti'n ekspire.

I ti azoute ki dan sa sif, apepre 40,000 i adilt ki swa in refer zot kart oubyen in ganny enn pour premye fwa. Sa larestan 2,000 dimoun ki'n fini ganny zot nouvo kart se bann zanfan par anba laz.

An sa ki konsern bann premye aplikasyon pour kart, sa ti enkli dimoun ki pa ti zanmen annan en kart oparavan oubyen lezot ki tou resaman in vin reste Seychelles.

Msye Lucas ti osi devwale ki i annan anviron 9,000 vye kart deor ki p'ankor ganny sanze, swa akoz zot ankor valid oubyen akoz dimoun senpleman pa enterese.

I ti fer resorti ki pour lemoman zot pa pe fer okenn kart akoz en mankman seal, en serten kalite riban ki vin konman en garanti lo kart. San sa seal, lenformasyon ki ganny enprimen lo kart i efase dan detrwa zour.

Msye Lucas ti fer resorti ki osito ki zot ganny sa materyo dan ankor en mwan edmi, zot pou rekonmans fer nouvo kart. Toudmenm, i ti azoute, zot biro i reste ouver pour bann dimoun ki bezwen lezot lasistans.

Msye Lucas in osi dir ki zot travay pour ranplas bann vye kart pandan lannen pase in al tre byen malgre plizyer problenm teknik ki'n met zot retar detanzantan.

I ti dir ki laplipar dimoun aze in fini ganny zot nouvo kart e sa in posib akoz zot seksyon ti pe ofer en servis spesyal dan distrik.

LINKS