Bann manm Lasanble Nasyonal ki ti fer zot lentervansyon dan dernyen sesyon deba lo prensip zeneral e merit Bidze 2004 ti fer resorti ki anliny avek nouvo Progranm Reform Makro-Ekonomik, bidze propoze par Vis-Prezidan James Michel Mardi 2 Desanm a permet gouvernman entansifye disiplin fiskal.

Tou bann manm parti mazoriter ki ti fer zot lentervansyon Mardi 9 Desanm – Onorab Terrence Mondon, Onorab Ansley Constance, Onorab Norbert Lepathy ek Onorab Dick Esparon  – ti dir ki anvi bann problenm ekonomik ki pei pe rankontre, sa bidze i enn realis ki pou ede sirmont sa bann difikilte.

Dan son lentervansyon Onorab Mondon ti dir ki sa bidze i en kontinyasyon legzersis pour redwir roupi an ekse dan lekonomi e lefe ki lanfaz in ganny mete lo reschedule bann det eksteryer sa ava anmenn rezilta konkret e pozitiv dan lekonomi apartir boner lannen prosenn.

Parey son bann lezot koleg dan parti mazoriter, Onorab Mondon ti dir ki alokasyon mwens larzan pour bann diferan minister pa vedir ki servis pou ganny afekte, okontrer sa a donn loportinite bann minister pour fer plis avek mwens larzan.

I ti azoute ki parfwa se dan bann letan pli difisil ki zonm i vin pli kreativ e inovativ.

Sa bidze, i ti dir, ava kree kondisyon pour bann minister al en pe pli lwen ki labitid dan planifikasyon ek lenplimantasyon zot bann progranm.

Lezot manm parti mazoriter ki ti pran laparol ti koz lo menm laliny andizan ki zot pou donn tou zot sipor sa bidze ki zot ti dir pou demann bokou sakrifis lo lapar tou pep Seselwa e ki pou osi kree en kiltir disiplin dan nou sosyete.

Lo son kote Onorab Constance ti dir ki malgre difikilte ekonomik ki pei pe pas atraver gouvernman i reste touzour senser dan son langazman anver son pep.

An pratik, i ti dir, sa bidze i enn ki realis e ki demontre laprev ki pei i lo bon semen.

Sa de manm Onorab dan Lopozisyon ki ti pran laparol – Ebrona Brioche e Collin Dyer – ti fer resorti dan zot dan lentervansyon ki zot kont sa rediksyon dan alokasyon bidze pour minister ledikasyon ek lasante, de laspe primordyal dan devlopman en pei.

Onorab Brioche ti dir keksoz ki’n resorti tre kler dan sa bidze se ki nou pei i dan en kriz. I ti dir ki lannen prosenn letan gouvernman pou koup lo lakantite travayer dan bann minister se bann dimoun pli mizer ki pou ganny met deor. Onorab Brioche ti dir ki bidze 2004 pou fer sitiasyon ekonomik vin pli pir.

Onorab Dyer ti dir ki de eleman enportan ki ed pei fer progre dan son lekonomi se latransparans ek lademokrasi, ki dapre li pa egziste Seychelles. I ti dir ki in ler pour revwar ki mannyer pour etablir en servis piblik pli efikas ki ava redwir gaspiyaz e elimin koripsyon.

LINKS