Gouvernman i'n eksprim konsern anver bann lensidan vyolans dan pei, sirtou apre lanmor ki'n arive tou dernyenman La Digue, Baie Lazare ek Pointe Larue.

Sa konsern ti eksprimen par Vis-Prezidan James Michel pandan progranm Tet-a-Tet Dimans 31 Out lo radyo SBC e i ti dir ki "nou bezwen vwar fason pour atak rasin sa fleo".

"I regretab ki i annan sa bann vyolans dan nou sosyete ki pe koz en kantite lapenn ek douler pour bann fanmiy e lakominote an zeneral. Sa bann lensidan i met nou pei an antye dan lapenn," Vis-Prezidan ti dir.

Sa progranm pou repete Lendi 1 Septanm 5.30 apremidi lo radyo.

Sa bann lensidan i'n ganny dekri konman en problenm konportman, en problenm ledikasyon, en problenm latitid, e mank respe pour valer imen.

VP i dir gouvernman pe diskit avek bann diferan lotorite, parey Minister Lasante pe al fer konsernan bann ka swisid, pour esey adres sa bann problenm dan en fason serye.

I dir ki lapolis i bezwen pli alert e sa lafors lalwa pou kontinyen ganny formasyon e lasistans teknik pour zot pli byen fer zot travay. Kot i konsern sikse lapolis VP ti mansyonnen ki depi 1993, dan 38 ka mert 29 ladan ti pas devan lakour e zize, 2 ka i ankor devan lakour e lanket pe kontinyen dan 2 lezot.

Sepandan, VP Michel ti azoute konman zefor pour ranvers sitiasyon vyolans fodre aret bann koze politik ki ensit vyolans e kree laenn, e fodre enkilke sa kiltir respe dan nou zanfan.

LINKS