Minister Litilizasyon Later ek Labita in anonse ki i pe entansifye son progranm lakaz dan distrik Grand Anse Mahe vi ki i annan ankor apepre 140 demann pour lozman.

Minis responsab sa minister Msye Joseph Belmont ti dir sa dan son diskour alokazyon louvertir en nouvo vilaz dan sa distrik Vandredi 10 Oktob apremidi dan kad bann aktivite pour mark Lasemenn Labita.

Sa vilaz, batize Riviere Seche, i konpri 14 lakaz  – 7 i annan de lasanm e 7 trwa lasanm.

Proze lakaz Riviere Seche in ganny antreprann par kontrakter Msye Maxim Monthy e in kout 4 milyon roupi antyerman finanse par gouvernman.

Bann envite kot seremoni louvertir sa vilaz, ki ti enkli sekreter prensipal dan Minister Litilizasyon Later ek Labita Joel Morgan, manm lasanble nasyonal pour Grand Anse Mahe Wilven William, parmi lezot ankor, ti ganny sans swiv en temwanyaz lo sa nouvo vilaz fer par en zabitan sa distrik Myra Nicholas.

Orizinalman sa sit kot bann lakaz in ganny konstrir ti en plantasyon lavanniy kot ti annan selman kat lakaz. Me apre debwazman, sa landrwa in aprezan vin en vilaz pour serten zabitan Grand Anse.

Pandan seremoni louvertir Minis Belmont ti lans en lapel avek bann zabitan sa vilaz pour pran swen avek zot lakaz.

"Ankor enn fwa mon oule lans en lapel pour ki nou viv an kominote e nou partisip osi dan bann aktivite distrik ki arive e nou reste ini konman en kominote," Minis Belmont ti demann avek bann zabitan.

Lo son kote Onorab William ti dekri realizasyon sa proze lakaz konman langazman serye gouvernman ki opouvwar ansanm ek son komite dan distrik.

I ti osi asir bann zabitan ki travay pa aret la pour kre posibilite pour bann ki ankor pe espere pour vin popriyeter zot prop lakaz dan lavenir.

Serten parmi bann lakaz dan nouvo vilaz Riviere Seche

LINKS