Biro Komisyonner Eleksyon in anonse ki lanrezistreman voter pour 2004 i konmanse demen Merkredi le 14 Zanvye e pou ale ziska Mardi le 27 Zanvye dan tou distrik lo Mahe, Praslin ek La Digue.

Legzersis lanrezistreman voter i en provizyon legal lalwa elektoral Seychelles e i devret ganny fer dan konmansman sak lannen.

Menm si fek annan eleksyon an 2002, sa legzersis i bezwen ganny fer e fodre ki tou dimoun ki kalifye konman en voter i al enspekte rezis voter dan son distrik.

Pandan lasemenn, savedir Lendi ziska Vandredi, lanrezistreman voter dan distrik pou fer depi 3er apremidi ziska 6er diswar.

Pandan wikenn, savedir Sanmdi ek Dimans, lanrezistreman voter pou fer depi 10er bomaten ziska 2er apremidi.

Kot Biro Eleksyon, lofis limero 203, Aarti Chambers, Mont Fleuri, vizavi lopital lanrezistreman voter pou fer depi 9er bomaten ziska midi e depi 1er apremidi ziska 6er diswar pandan lasemenn e 10er bomaten ziska 2er apremidi pandan wikenn.

En dimoun i kalifye pour anrezistre konman en voter si i en sitwayen Seychelles;

i annan 18 an an montan; i reste dan en sirkonskripsyon elektoral; i pa'n anrezistre konman en voter dan en lot distrik; i pa diskalifye konman en voter dan okenn eleksyon; i pa pe servi en santans prizon enpoze par en lakour Seychelles pour en peryod sis (6) mwan; i pa'n ganny deklare ofisyelman par en lakour konmkwa ki i fou ouswa detenir konman en kriminel; i pou ganny 18 an nenport zour dan en peryod 15 mwan apre le 1 Zanvye 2004.

Dimoun ki'n sanz zot non ouswa ladres, zot bezwen al fer en demann pour koriz sa lerer dan rezis voter zot distrik.        

Si en dimoun in sanz son non swa par maryaz ouswa divors, i enportan ki i anmenn lorizinal sa sertifika maryaz/divors ek en fotokopi sa menm sertifika.

Biro Komisyonner Eleksyon i fer resorti ki i enportan ki ou anmenn ou kart idantite avek ou ler ou al enspekte rezis voter pour fer sir ki ou detay i koresponn avek rezis voter. I osi tre enportan ki ou donn lenformasyon korek letan ou pe anrezistre, vi ki i en lofans pour donn fo lenformasyon e osi neseser pour prodwi en bon rezis voter ki kredib. 

Landrwa kot ou kapab al enspekte rezis voter i swivan:    

Anse aux Pins (Lekol Anse aux Pins); Au Cap (Lenstiti Kreol ek lakres Pointe au Sel); Anse Boileau (Sant kominoter Anse Boileau); Anse Etoile (Sant kominoter Anse Etoile); Anse Royale (Lekol Anse Royale ek Kordgard Anse Royale); Baie Lazare (Lakres Baie Lazare); Baie Ste Anne (Lekol Baie Ste Anne); Beau Vallon (Lakres Beau Vallon); Bel Air (Sant kominoter Bel Air); Bel Ombre (Sant kominoter Bel Ombre); Cascade (Sant kominoter Cascade); Glacis (Sant Reabilitasyon North East Point ek Lekol Glacis); Grand Anse Mahe (Lekol primer Grand Anse Mahe ek Lekol La Misere); La Digue (Biro administrasyon distrik); Grand Anse Praslin (Sant kominoter Grand Anse Praslin); Les Mamelles (Klinik Les Mamelles); Mont Buxton (Lekol La Rosiere); Mont Fleuri (Lenstiti Ledikasyon Nasyonal 'NIE');  Plaisance (Biro administrasyon distrik Plaisance); Port Glaud (Lekol Port Glaud); Pointe Larue (Lakres Pointe Larue); Riviere Anglaise (Lekol Riviere Anglaise); Roche Caiman (Lekol primer Plaisance); St. Louis (Lekol Belonie 'ansyen St. Jean Bosco'); Takamaka (Sant kominoter Takamaka); Tou distrik (Biro Komisyonner Eleksyon, Aarti Building, Mont Fleuri, Lasanm 203).

LINKS