Minis pour Zafer Sosyal ek Lanplwa, Msye Dolor Ernesta, in donn leklersisman lo bann kriter ki ganny servi pour determinen si en endividi i kalifye pour serten benefis anba sekirite sosyal ou non.

Minis ti donn sa leksplikasyon pandan sesyon demann kestyon dan Lasanble Nasyonal Mardi le 11 Mars. I ti pe reponn kestyon manm elekte pour distrik Bel Ombre, Onorab Nicolas Préa, ki ti'n demande ki kriter ki ganny servi pour rezet lasistans pour en dimoun avek kek dezabilite menm kan en dokter in sertifye.

Minis ti dir ki i annan plizyer lasistans anba sistenm sekirite sosyal e ki apard benefis dezabilite, i osi annan lezot parey benefis aksidan, benefis envalidite e benefis enkapasite.

Anba benefis aksidan, ou bezwen en sertifika medikal ek levidans ki ou ti deza dan lanplwa pour ou kapab kalifye. Pour benefis envalidite, en dokter pa ase pour sertifye en endividi alor sa ka i bezwen al devan en bord medikal.

Menm prensip i ganny swiv pour benefis enkapasite, tandis ki kriter pour benefis anba sistenm Home Carer i varye, enkli sa enn kot ka sa endividi i pas devan bord medikal.

Lezot fakter pour benefis Home Carer i pran an konsiderasyon si sa dimoun pe ganny okenn lezot lasistans parey Means Test, ki kapasite sa dimoun pour pran swen ek son prop lekor e ki mwayen son fanmiy.

Minis ti answit note ki Fon Sekirite Sosyal i annan en gid dan ki bann prosedir in ganny met o-kler e ki devret ed bann dimoun determinen ki kalite benefis zot merite depandan byensir lo zot problenm respektiv.

Antretan, Minis Ernesta ti osi konfirmen ki son minister i annan plan pour amelyor kapasite simityer Anse Boileau sa lannen.

I ti dir sa letan i ti pe reponn kestyon reprezantan sa distrik, Onorab André Pool, kot i ti osi dewvale ki pou annan en dezyenm semen ki pou al dan simityer sa distrik.

LINKS