Restan lakaz Madanm Mathiot

En dife in detri preski antyerman en lakaz Quincy Village Mardi le 13 Zanvye,  gran maten.

Sete ver 2er55 bomaten ki proprieter sa lakaz, Madanm Anne-Marie Mathiot, ti ganny alerte par son garson ki i ti'n tann pete deor kot son loto.

Dapre Madanm Mathiot, ki manm Lasanble Nasyonal pour distrik Anse Etoile, se a sa moman ki zot ti leve e vwar lafimen ek laflanm pe pran deryer kot garaz e dan plafon.

Tou-d-swit, zot ti telefonn 999 pour rod lasistans brigad tenny dife ki, dapre Sirentandan Eddy Payet, ti kit stasyon 1 minit apre ki zot ti'n ganny sa kou-d-telefonn 2er58 bomaten.

Nef zonm dan 2 gro masin ti ganny deplwaye pour al konbat sa dife.

Touzour dapre Msye Payet, an arivan dan krwaze semen Quincy Village, zot ti remarke ki ti annan transpor ki ti'n stasyonnen dan semenn e sa gro masin pa ti pou kapab pase. Deswit stasyon ti ganny notifye pour deplway en pli pti masin ki ti kit 3er08 e pa ti pran bokou letan pour li ariv lo sit kot dife.

Dapre Sirentandan Payet ti pran zot 15 minit pour met dife anba kontrol e apepre 1 er-d-tan pour tenny li konpletman vi ki zot ti osi resevwar enpe problenm presyon delo.

Sirentandan Payet ti azoute ki an arivan kot lakaz, trwa lasanm ti deza anflanm e i posib ki dife in kapab komans deor kot garaz dan loto garson Madanm Mathiot e apre propaz dan plafon answit pran anba dan lakaz.

"Lefe ki divan ti osi pe vant dan direksyon sid in zwe en rol pour propaz dife," Sirentandan Payet ti dir.

Fodre fer remarke ki avan brigad tenny dife ti ariv kot lensidan, bann vwazen ti'n konmans tenny dife an servan rakor.

Ler dife ti pran ti annan kat dimoun dan lakaz. Sa i enkli Madanm Mathiot ek son trwa garson e zot tou zot ti pe dormi.

Malgre ki sa lakaz limenm in sibir bokou domaz e preski tou keksoz ladan in konpletman brile, Madanm Mathiot, ki'n reste Quincy Village pandan 25 an, ti reisi sov serten meb dan salon ek lakwizin ensi ki retir en transpor lwe ki ti lanmenm pre obor lakaz.

Ziska ler en estimasyon valer domaz pa ti ankor ganny fer me en lanket in ouver pour determin lakoz e sirkonstans sa dife.

LINKS