Lazournen Enternasyonal Lafanmiy

Viv pour zot fanmiy, Prezidan i demann paran

Prezidan Michel

Prezidan James Michel in demann tou papa ek manman pour viv pour zot fanmiy, pour montre zot zanfan respe pour zot prop lekor e pour lezot, lanmour, lonnette, lwayote e responsabilite.

Sa i sorti dan mesaz Prezidan Michel alokazyon Lazournen Enternasyonal Lafanmiy Sanmdi le 15 Me.

Teks entegral mesaz Prezidan Michel i lir konm swivan:

“Alokazyon 10enm Lazournen Enternasyonal Lafanmiy, mon swe se ki tou zanfan,  manman, papa, e osi nou gran paran i viv dan boner, prosperite e lape.

“An 2004, ki lannen Renesans Moral, i enportan ki lafanmiy i retrouv son plas santral dan formasyon en sosyete respektab. I dan lafanmiy kot nou zanfan i komans pran bann bon labitid e valer moral avek nou paran.

“Mon enplor tou papa, tou manman, pour viv pour zot fanmiy, pour montre zot zanfan respe pour zot prop lekor e pour lezot, lanmour, lonnette, lwayote e responsabilite.

“Dan nou fanmiy i devret fasil pour aprann kontan; plitar nou partaz lanmour e ganny lanmour an retour. I byen nou aprann fer bann pti louvraz e rann servis; plitar nou a ganny sa labitid debrouye pour fer keksoz pour nou menm e lakominote. I bon ki nou tou nou pran sa plezir konstrir, ansanm; plitar nou a itil pour nou menm e kontribye ver plis solidarite dan lasosyete ki nou viv ladan.

“Nou’n remarke ki akoz devlopman rapid nou sosyete pe vin enpe tro materyalistik. Konfor materyel pa kapab ranplas boner e satisfaksyon ki nou gannyen ler nou zanfan pe ganny lafeksyon e pe grandi anba en bon gidans moral.  En lafanmiy stab i devret nou premye boner. 

“Mon remersye tou dimoun dan bann lorganizasyon, legliz, gouvernman, NGO e volonter ki pe donn lafanmiy e zanfan sa latansyon ekstra.”

LINKS