Lasanble Lazenes in dir ki in reisi akonpli plizyer son bann lobzektif lannen pase e ki sa lannen i anvizaze ogmant lakantite fwa ki i zwenn.

Sa ti ganny fer resorti par Speaker Clifford Andre letan i ti pe prezid lo dernyen sesyon sa lasanble pour lannen 2003 mwan pase.

Dan sa dernyen rankont, ki ti deroul National House, bann zenn onorab ti swiv de prezantasyon, enn fer par Joseph Francois en zofisye Minister Lanvironnman e en lot fer par Ronny Renaud, en reprezantan Fondasyon bann Zil (SIF).

Bi sa de prezantasyon ti pou ranforsi konesans bann manm Lasanble Lazenes  lo de size prensipal, parmi en konvansyon apele 'The Protocol of Biosafety ' ki gouvernman Seychelles in sinyen me píankor ratifye.

Apre prezantasyon Msye Francois, bann zenn ti ganny loportinite pour deman kestyon e eksprim zot konsern lo ki fason sa konvansyon i kapab afekte Seychelles.

Dan ka SIF, Msye Renaud ti koz lo proze tourizm lo Aldabra ki pou anmenn en serten sonm reveni pour fasilit fonksyonnman bann loperasyon lo sa zil.

Ankor bann onorab ti poz diferan kestyon apre prezantasyon tel ki bann lefe advers ensi ki benefis sa devlopman touristik i kapab anmennen.

Lasanble ti osi diskit lo en mosyon propoze par Onorab Dereck Samson ki ti eksplor bann fakter prensipal dan Seychelles ki okazyonn maladi kardyovaskiler.

Lanse le 30 Zilyet 2003, Lasanble Lazenes i en parlman ki konpri 40 zenn manm, en Speaker, en asistan Speaker, en klark ek en asistan klark.

Sa lasanble, ki en proze pilot inisye par Departman Lazenes dan Minister Ledikasyon ek Lazenes, pa en platform politik me plito en foronm edikasyonnel avek bi enkilke dan lazenes bann kalite pour vin bann bon dirizan anmenmtan ki zot aprann valer lademokrasi.

Bann manm sa lasanble I aze ant 15 e 25 an e zot sorti prensipalman dan bann lekol, landrwa travay e lorganizasyon lazenes.

LINKS