Zabitan distrik Anse Royale pou byento benefisye avek de nouvo proze ki enkli lenstalasyon elektrisite "Dezer" ek konstriksyon en nouvo biro kot bann zabitan sa distrik ensi ki lezot distrik rezyon sid pou kapab fer peyman elektrisite ensi ki delo.

Sa ti ganny devwale par Minis pour Lendistri ek Biznes Enternasyonal, Msye Jacquelin Dugasse, pandan sesyon demann kestyon dan Lasanble Nasyonal yer.

Minis ti pe reponn de kestyon poze par manm elekte pour sa distrik, Msye Barry Faure, lo rezon ki Banque Francaise Commerciale (BFC) in deside termin servis pour fer peyman konsomasyon elektrisite ek delo kot sa labank e kan eski PUC (Korporasyon Litilite Piblik) i annan lentansyon anmenn elektrisite "Dezer".

Minis Dugasse ti dir ki in aprann atraver PUC ki sa nouvo proze, ki'n fini ganny aprouve, pour enstal elektrisite "Dezer" i ekspekte konmanse tre byento de ki PUC i fini etablir bann kestyon lozistik.

Minis Dugasse ti dir ki letan i konplete sa proze, ki ekspekte kout 265,000 roupi, pou benefisye sa senk fanmiy ki pe deza reste dan sa landrwa e i pou en proze lon-term ki pou osi benefisye fitir devlopman dan sa landrwa lefe ki sa landrwa i etale lo 26 ektar later.

Minis ti osi fer remarke ki PUC i ekspekte depans anviron R140,000 pour kapab enport bann materyo debaz, tel parey poto ki pou ganny mete lo 1.2 kilomet semen ek kab pour sa nouvo proze.

Letan i ti pe reponn dezyenm kestyon Onorab Faure lo rezon akoz Banque Francaise Commerciale (BFC) in deside termin sa servis pour fasilit peyman konsomasyon elektrisite ek delo kot sa labank par manm piblik, Minis Dugasse ti dir ki dapre PUC, anba sa lakor ki sa de lakonpannyen ti sinyen, PUC ti bezwen pey BFC en sonm 25,000 roupi par mwan pour sa servis. Lefe ki sa labank i annan en brans dan distrik Anse Royale, sa de lakonpannyen ti osi agree pour ofer sa servis laba osi kot i ti osi benefisye pa zis bann zabitan Anse Royale me sid Mahe annantye.

Dapre Minis Dugasse, sete an Septanm lannen pase ki BFC ti enform PUC ki apartir Zanvye sa lannen sa labank ek son bann brans pa pou kapab kontinyen donn bann kliyan PUC sa servis.

Rezon ki sa labank in donnen i ki in annan en logmantasyon sibstansyel pandan sa bann dernyen lannen dan son lakantite kliyan komersyal. Sa in fer ki sa labank in deside pour donn priyorite servis bann kliyan ki annan en kont avek sa labank apre ki in annan plizyer konplent par bann tel kliyan ki bann dimoun ki vin pey bann bil elektrisite ouswa delo i kre konzesyon e retard servis dan sa labank.

Lefe ki PUC ek gouvernman i konsyan lenportans donn en bon servis, sa de parti pe get dan posibilte rod lezot alternativ pour kapab desantraliz sa servis.

Minis ti dir ki PUC pe fer bann demars ek negosiasyon neseser pour ouver en lofis dan distrik Anse Royale pour ki son bann kliyan sid Mahe i kapab kontinyen ganny bann servis ki zot ti pe gannyen.

I ti dir ki sa nouvo lofis, ki pou konekte avek biro PUC anvil atraver konpiter, pou osi ofer servis adisyonnel tel ki fer laplikasyon pour koneksyon elektrisite ek delo.

LINKS