Lakrwa Rouz Seychelles i anmenn premye swen dan distrik

Manm Lakrwa Rouz Seychelles pe fer enn zot bann legzersis premye swen

Lasosiasyon Lakrwa Rouz Seychelles pe komans en proze pour entrodwir premye swen avek bann dimoun dan distrik.

Sa proze, ki ekspekte komanse le 6 Mars, i antyerman en linisyativ Lakwra Rouz Seychelles an kolaborasyon avek Minister Gouvernman Lokal, Spor ek Kiltir e pou ganny fer dan Sanmdi.                                     

Sa ti ganny anonse par Msye Roy Nibourette, responsab progranm Lakrwa Rouz pour Seychelles.  

Dapre Msye Nibourette sa progranm i kapab benefisye bann dimoun dan kominote par ogmant zot kapasite pour asiste dan bann sitiasyon dirzans ki zot rankontre dan lavi toulezour.

"Souvan kot lakour ou dan kominote nou rankontre diferan sitiasyon ki nou ti kapab evite vin fatal si premye swen ti'n ganny administre olye zis esper lasistans," Msye Nibourette ti dir.  

Touzour dapre Msye Nibourette, sa legzersis i osi kapab redwir lenpak ek kou bann ka ki pa neseser al lopital me ki kapab ganny trete dan lakour. 

Parmi bann size ki pou ganny aborde dan sa progranm i enkli ki mannyer pour tret diferan ka tel ki brile, sok elektrik, bwar pwazon, sok, ganny morde ek zannimo, parti lekor kase e osi bann ka noye.   

"Vi ki nou bezwen antrenn bann enstrikter koman bann fasilitater sa progranm, kou transpor, materyo pour travay avek, kou administratif ek lezot detay ankor, nou bidze in deza ariv 80,400 roupi," Msye Nibourette ti fer remarke.        

I ti azoute ki finansman sa proze i enn bann lobstak ki zot bezwen sirmonte e se pour sa rezon ki i pe profite pour lans en lapel avek bann lorganizasyon e manm piblik an zeneral  ki santi zot kapab ede finansyerman pour vin devan pour byennet lakominote. 

Sa ki enterese pour swiv bann kour dan zot distrik zot ganny demande pour anrezistre avek biro ladministrasyon dan bann semenn ki pe vini.

LINKS