Depi ki lenspeksyon rezis voter in komanse Merkredi pase, manm piblik pe byen reponn lapel Biro Komisyon Eleksyon pour vin tyek zot non.

Dapre Sef Zofisye Lanrezistreman, Msye Anaclet Tirant, sa legzersis pe deroul dan en fason satisfezan apre sa premye semenn e zot swete ki i kontiny dan sa fason e menm amelyor en pe plis pandan sa dezyenm e dernyen semenn.

Statistik pour peryod ant Merkredi le 14 a Dimans le 18 i montre ki en total 2471 dimoun ti al anrezistre kot plizyer bann stasyon dan distrik.

Sa legzersis ti vwar pli gran group dimoun pandan wikenn. Par egzanp Sanmdi 560 dimoun ti al tyek zot non lo lalis tandis ki Dimans 1004 dimoun ti al enspekte rezis.

Tou-d-menm Msye Tirant in dir ki o-komansman lanrezistreman ti pe al ase dousman. Merkredi 369 dimoun ti vin kot bann diferan stasyon, Zedi ti rikord ankor 305 dimoun tandis ki Vandredi 325 ti vin tyek zot non.

"Konpare avek lannen pase safwasi manm piblik in pli byen reponn nou lapel pour vin verifye zot non lo lalis voter," Msye Tirant ti azoute.

Sef Zofisye Lanrezistreman in profite pour fer rapel tou bann dimoun ki pou ganny 18 an ziska Mars lannen 2005 pour al anrezistre dan zot distrik oubyen kot Biro Konmisyon Eleksyon, Aarti Chambers.

Bann dimoun ki'n sanz zot ladres oubyen zot non apre maryaz oubyen divors, bann ki'n fek natiralize Seselwa, bann ki'n retournen sorti aletranze pandan plis ki trwa mwan ek bann prizonnyen ki'n ganny large, zot bezwen al verifye rezis pour fer sir ki zot non i ganny enkli oubyen fer bann modifikasyon neseser.

Msye Tirant ti osi azoute ki zot pe vin pli strikt avek bann dimoun ki pe fer transfer. "I enportan ki zot donn bann zofisye lanrezistreman lenformasyon kredib an sa ki konsern distrik kot zot reste," i ti dir.

Fodre note ki donn fo lenformasyon pandan en legzersis lanrezistreman i en lofans anba lalwa.

Dan bann distrik biro lanrezistreman pou reste ouver pour ankor en semenn, depi 3er apremidi ziska 6er diswar pandan lasemenn (Lendi a Vandredi) e depi 10er bomaten ziska 2er apremidi pandan wikenn (Sanmdi ek Dimans). Kot Biro Komisyon Eleksyon manm piblik i kapab al verifye rezis depi 9er bomaten ziska midi e 1er apremidi ziska 6er diswar pandan lasemenn e ant 10er bomaten a 2er apremdi pandan wikenn.

Dernyen zour lenspeksyon rezis voter pour sa lannen i le 27 Zanvye.

LINKS