En deba ek legzibisyon pour promouvwar manze lokal pour baba ti ganny organize Mardi le 21 Oktob,  dan biro ladministrasyon distrik Baie Lazare.

Plizyer paran ti profite pour vin asiste en tel rankont kot nitrisyonnis Christina Esther e en zofisye dan seksyon nitrisyon, Marie-Helene Niole, ti konsey zot lo ki kalite manze ki baba i devret pe servi.

Size ki ti ganny aborde ti lefe ki baba i devret konmans manz a laz sis mwan olye ki kat mwan. Dan son leksplikasyon Manmzel Esther ti demann paran pour otan ki posib donn dile tete zot zanfan ziska ler zot ganny sis mwan.

I ti konsey zot pour konmans entrodwir baba ek bann manze lokal tel ki fri ek legim olye ki bann manze dan bwat ki anvant dan laboutik.

Bann paran ti osi ganny sans demann serten leklersisman lo ki fason zot kapab prepar sa bann manze lokal pour baba.

Demonstrasyon ti osi ganny fer pour montre konman manze ti ganny prepare pour bann zanfan dan tan lontan kot apre Manmzel Esther ti konpar sa ek bann manze ki nou devret pe donn baba.

Dan legzibisyon lanfaz ti ganny mete lo valer nitritif bann legim, fri ek gro manze dan repa en baba. Ti osi annan lekspozisyon sa bann diferan prodwi e osi bann diferan pla ki paran i kapab prepare pour zot baba.

Ners pour lasante lafanmiy sa distrik, Manmzel Farida Andre, ti dir ki zot in deside fer en tel aktivite anvi ki dan zot bann vizit kot paran zot in dekouver ki bokou pe ganny difikilte pour entrodwir manze nitritif avek zot zanfan.

"Nou anvi ki paran i realiz valer nitritif bann manze lokal e ki zot servi sa bann manze olye ki bann ki vann dan bann pti kontener dan laboutik," Manmzel Andre ti dir.

Pour terminen bann baba sis mwan ki ti prezan ti ganny sans degiste bann pla ki ti'n ganny prepare espesyalman pour zot.

LINKS