Loperasyon kont vol ek vyolans

Prezidan Michel i reasir lepep

Prezidan James Michel in souliny lenportans sa loperasyon konzwent ki in ordonnen ant Lapolis ek Lafors Defans pour konbat sa nouvo vag vol ek vyolans dan pei, en sitiasyon ki in dir i pe pran tre o serye.

In osi anons lenstalasyon en hotline avek nimero 32 33 33 kot piblik i kapab kontakte Lapolis lo en baz 24-er kot zot a kapab devwal lenformasyon san donn zot idantite si zot pa oule

Prezidan Michel ti fer sa lanons letan i ti pe adres lepep Seselwa lo televizyon ek radyo SBC Vandredi 21 Me  aswar lo lenportans sa loperasyon konzwent pour reanmenn lape ek sekirite dan pei.

Ladres Prezidan Michel ti ganny rikorde Vandredi bomaten zis apre ki i ti'n rankontre bann zofisye sekirite pour diskit lo bann mezir ki bezwen ganny pran pour met en lafen avek sa vag vyolans ki pe anvai pei. 

Sa rankont ti ganny asiste par Sef-Deta Mazor Kolonnel Leopold Payet ek Komisyonner Lapolis par enterim, Sef Sirentandan Antoine Belmont. Sef Sirentandan Belmont ti pe ranplas Msye Andre Quilindo ki lo en misyon travay a letranze.

Dan son ladres, Prezidan Michel ti fer rapel ki apre serten lensidan vyolan pli boner sa semenn, i ti demann Lapolis pour entansifye zot loperasyon avek led Lafors Defans.

“Ozordi nou pe al en pe pli lwen pour met plis mekanizm anplas pour dil avek sa problenm,” I ti dir.

Prezidan Michel ti dir ki apre sa rankont avek bann zofisye sekirite, in demann Lapolis ek Lafors Defans pour finaliz en loperasyon ki pou pran lefe imedyatman.

"Mon ekspekte Lapolis pou pran mezir neseser pour fer sir ki sa loperasyon i en sikse a kour-term osi byen ki a lon-term. Mon pou osi demann Prokirer Zeneral pour revwar bann lenstriman legal pour vwar ki fason nou kapab adres sa problenm an konsiltasyon avek zidisyer," Prezidan Michel ti dir.

"Si lepep pa kapab dormi anpe, nou bezwen fer sir ki sa bann ki pe menas lape ek boner nou pei zot osi zot pa dormi anpe," Prezidan Michel ti azoute.

Prezidan Michel ti fer resorti o komansman son ladres ki i pe pran sa sitiasyon vol ek vyolans dan pei tre serye.

"I pran zis en pti group dimoun pour senm laterer e fer nou pa dormi anpe aswar. Pour fini kont nou ferm nou laport boner, nou pa kapab byen konsantre dan nou travay e nou kit nou landrwa travay byen boner pour ariv kot nou avan fernwanr i fer," i ti dir.

Lasosyete, Prezidan Michel ti azoute, "i viv dan lenkyetid, prodiktivite dan pei i tonbe e touris ki dan pei i al dir avek zot kanmarad pa vin Seychelles”.

"Mon pa pare pour les tou sa bann travay ki nou'n fer ansanm tonm dan delo. Mon pa pou toler vyolans ek krim dan nou pei," Prezidan ti dir.

Prezidan Michel ti lans en lapel avek tou manm piblik pour ed zot ratrap sa sitiasyon e reanmenn lape dan pei.

I ti osi profit sa lokazyon pour donn son soutyen personnel e on non pep Seselwa, bann fanmiy, zanfan e tou endividi ki'n ganny afekte dan sa bann lensidan ziska prezan.

"Mon pou fer tou sa ki posib pour retourn nou pei lo bon semen," Prezidan ti dir.

LINKS